حیدرآباد: چیف منسٹرکے چندرشیکھرراؤ ضلع نلگنڈہ میںچہارشنبہ کو خطاب کریں گے۔ جلسہ عام کی تیاریاں مکمل کرلی گئی ہیںجس کامعائنہ آج وزیر برقی جگدیش راؤ نے رکن راجیہ سبھا بی لنگیایادو،رکن اسمبلی کشور،سابق رکن کونسل کے پربھاکر اور دیگر کے ساتھ کیا۔انہوں نے جلسہ گاہ اور اطراف کے علاقوں کا معائنہ کرتے ہوئے مناسب انتظامات کی ہدایت دی۔یہ جلسہ ضلع کے انوملامنڈل کے علی نگر کے حدود میں ہونے والا ہے ۔متحدہ ضلع نلگنڈہ کی 1,04,600ایکڑ اراضیات کو سیراب کرنے کیلئے تین ہزار کروڑ روپئے کے مصارف سے 13لفٹ اریگیشن پروجیکٹس کو چیف منسٹر کے چندرشیکھر راؤ نے منظوری دی ہے ۔اس سلسلہ میں وزیراعلی ان پروجیکٹس کے کاموں کا سنگ بنیاد رکھیں گے ۔کے سی آر سے اظہار تشکر کے لئے ضلع کے ٹی آرایس لیڈروں اور کارکنوں کی جانب سے جلسہ کا اہتمام کیاجارہا ہے جس سے چیف منسٹر خطاب کریں گے ۔اس جلسہ میں 12حلقوں کے حکمران جماعت کے لیڈروں،کارکنوں اور کسانوں کی بڑی تعداد کی شرکت متوقع ہے جس کیلئے کافی بہتر اور مناسب انتظامات کو یقینی بنانے کے اقدامات کئے جارہے ہیں۔چیف منسٹر کے اس دورہ کو ناگر جنا ساگر اسمبلی حلقہ کے ضمنی انتحاب کیلئے عملاً مہم کا آغاز سمجھا جارہا ہے۔
