کراچی ۔30 جولائی (سیاست ڈاٹ کام ) شائقین کرکٹ نے پاکستان کرکٹ بورڈ(پی سی بی) کی جانب سے کروائے گئے سروے میں پاکستان اور ہندوستان کے درمیان کھیلے گئے 1999 کے چینائی ٹسٹ کو پاکستانی ٹیم کی ٹسٹ کرکٹ کی تاریخ کا سب سے بہترین ٹسٹ میچ قرار دے دیا۔ پی سی بی نے 26 تا 29 جولائی پاکستان کی ٹسٹ کرکٹ کی تاریخ کے بہترین میچ کے حوالے سے ووٹنگ کرائی تھی جس میں چار ٹسٹ میچوں کو شامل کیا گیا تھا اورشائقین کرکٹ نے ہندوستان کے خلاف 12رنز سے کامیابی کو ٹیم کی عظیم ترین ٹسٹ فتح قراردیا۔ مذکورہ ووٹنگ میں 15ہزار 847 صارفین نے فیس بک اور ٹوئٹر کے ذریعے اپنی رائے کا اظہارکیا اور65 فیصد صارفین نے چینائی ٹسٹ کے حق میں ووٹ دیا۔ ووٹنگ کی فہرست میں1987کا بنگلور ٹسٹ، 1954کا اوول ٹسٹ اور1994 کا کراچی ٹسٹ بھی شامل تھا جنہیں بالترتیب 15فیصد،11 فیصد اور10 فیصد ووٹ موصول ہوئے۔ ان چار ٹسٹ میچوںکا انتخاب ماہرین اورکرکٹ کی تاریخ پر عبور رکھنے والے آزاد پینل نے کیا تھا جس میں بینی ڈکٹ برمانگے، مظہر ارشد، قمر احمد اورڈاکٹرنعمان نیاز شامل تھے۔ چینائی میں کھیلے اس ٹسٹ میچ میں پاکستان نے پہلے کھیلتے ہوئے معین خان اور محمد یوسف کی نصف سنچریوں کی بدولت 238 رنز اسکورکئے تھے، ہندوستانی اسپنر انیل کمبلے نے 70 رنزکے عوض 6 اورجواگل سری ناتھ نے 3 وکٹیں لی تھیں۔ اس کے جواب میں ہندوستان کی ٹیم بھی بڑی برتری لینے میں ناکام رہی تھی اور پوری ٹیم 254 رنز پر ڈھیر ہوگئی تھی۔ سوروگنگولی نے 54 اور راہول ڈراویڈ نے 53 رنزاسکورکیے تھے۔پاکستان کی جانب سے ثقلین مشتاق نے94 رنزکے عوض 5 اورشاہد آفریدی نے31 رنزکے عوض 3 وکٹیں لی تھیں۔ پاکستان نے دوسری اننگز میں شاہد آفریدی کے 141 اور انضمام الحق کی 51 رنز کی اننگز کی بدولت 286 رنزاسکورکئے اور ہندوستان کو فتح کے لیے 271رنزکاہدف دیا تھا، وینکٹیش پرساد نے 33 رنزکے عوض 6 وکٹیں لی تھیں۔ ہدف کے تعاقب میں ہندوستان ٹیم صرف 82 رنز پر5 وکٹوں سے محروم ہو گئی تھی لیکن اس موقع پر سچن تنڈولکر کے ساتھ نین مونگیا وکٹ پر ڈٹ گئے اور دونوں نے چھٹی وکٹ کے لیے 136رنز کی شراکت قائم کر کے ہندوستانی ٹیم کی کامیابی کے امکانات روشن کر دیے۔ مونگیا 52 رنز پر پویلین لوٹے تو پاکستان کی کامیابی کی امید ایک مرتبہ پھر پیدا ہوگئی لیکن تنڈولکر پاکستان اور کامیابی کے درمیان حائل تھے اور اسکورکو254 تک لے گئے۔
اس موقع پر ثقلین مشتاق کی ایک گیند پر بڑا شاٹ کھیلنے کی غلطی تنڈولکر کو بہت مہنگی پڑی اور وہ اپنی وکٹ اور ہندوستان نے ٹسٹ گنوا دیا۔
اس کے بعد محض چار رنز کے اضافے پر باقی تین بیٹسمین بھی پویلین لوٹ گئے اور پاکستان نے سنسنی خیز مقابلے کے بعد 12رنز سے کامیابی حاصل کرلی ۔چینائی ٹسٹ میں پاکستانی ٹیم کی قیادت کرنے والے وسیم اکرم نے کہا کہ اگر اس وقت میچ براہ راست دیکھنے والوں کے آج بھی اس میچ کے بارے میں سوچ کر رونگھٹے کھڑے ہو جاتے ہیں، تو سوچیں کہ اس وقت میچ کھیلنے والوں کے کیا جذبات اور احساسات ہوں گے۔ ہم سب کرکٹ میچ میں دباؤ اور بدلتی ہوئی حالت کے بارے میں بہت بات کرتے ہیں لیکن اگر کوئی جاننا چاہتا ہے کہ دباؤکیا ہوتا ہے اور اس کو برداشت کر کے کیسے کارکردگی دکھائی جاتی ہے تو یہ ٹسٹ میچ ایک مثال ہے۔ انہوں نے کہا کہ جن چار ٹسٹ میچوں کو منتخب کیا گیا میں ان میں سے تین کا حصہ تھا، میں شائقین کی جانب سے چینائی ٹسٹ کا انتخاب کرنے پر بالکل متفق ہوں اور یہ واقعی ہماری تاریخ کا عظیم ترین ٹسٹ میچ تھا۔
