شنگھائی، 24 نومبر (آئی اے این ایس)اروناچل پردیش سے تعلق رکھنے والی برطانوی نژاد ہندوستانیخاتون پرِما وانگجوم تھونگڈوک نے الزام لگایا ہے کہ شنگھائی پڈونگ ایرپورٹ پر چینی امیگریشن نے ان کا ہندوستانی پاسپورٹ تسلیم کرنے سے انکارکرتے ہوئے تقریباً 18 گھنٹے تک انہیں روکے رکھا، کیونکہ پاسپورٹ میں ان کی پیدائش کی جگہ اروناچل پردیش درج تھی۔ پرِما کے مطابق متعلقہ عہدیداروں نے کہا کہ اروناچل پردیش چین کا حصہ ہے، انہیں ہنس کر مذاق کا نشانہ بنایاگیا اور چینی پاسپورٹ لینے کا مشورہ بھی دیا گیا۔ پاسپورٹ ضبط کرکے انہیں جاپان کی اگلی پرواز میں سوار ہونے سے روک دیا گیا، جبکہ وہ درست ویزا رکھتی تھیں۔وہ ٹرانزٹ زون میں محدود رہیں، جہاں نہ ٹکٹ ری بک کر سکیں، نہ ضروری سہولتیں حاصل کر پائیں۔ انہوں نے دعویٰ کیا کہ عملہ انہیں مخصوص طور پر چین ایسٹرن کی نئی ٹکٹ خریدنے کے لیے دباؤ ڈالتا رہا۔ بعد ازاں ایک دوست کے ذریعے ہندوستانی قونصل خانے سے رابطہ ہوا، جس کی مداخلت پر انہیں رات کی پرواز میں روانہ کیا گیا۔ پرِما نے وزیر اعظم نریندر مودی کو خط لکھ کر اس واقعے کو ہندوستان کی خودمختاری کی توہین قرار دیا اور مطالبہ کیا کہ چین سے اس معاملے پر جواب طلب کیا جائے، ذمہ دار عہدیداروں کے خلاف کارروائی ہو اور اروناچل کے شہریوں کے سفرکو محفوظ بنانے کے لیے اقدامات کیے جائیں۔
