واشنگٹن: امریکہ کے صدر جو بائیڈن نے چین کے صدر شی جن پنگ کو دوطرفہ ملاقات کی پیشکش کی تھی جسے میڈیا رپورٹس کے مطابق شی جن پنگ نے مسترد کردیا تھا۔غیر ملکی میڈیا کے مطابق جو بائیڈن نے حال ہی میں مسٹر جن پنگ کے ساتھ ٹیلی فون پر گفتگو کے دوران دو طرفہ ملاقات کی پیشکش کی تھی جسے چینی صدر شی جن پنگ نے ٹھکرا دیا۔فنانشل ٹائمز نے کئی ذرائع کے حوالے سے بتایا گیا تھا کہ مسٹر بائیڈن اپنے چینی ہم منصب کے ساتھ دوطرفہ مذاکرات کی کوشش میں ناکام رہے ہیں۔ اخبار نے خبر دی ہے کہ مسٹر بائیڈن نے مسٹر جن پنگ کو دونوں رہنماؤں کے درمیان دوطرفہ سربراہی کانفرنس کی میزبانی کی پیشکش کی تھی ، لیکن چینی صدر نے ان کی پیشکش کو یہ کہتے ہوئے ٹھکرا دیا کہ امریکہ کو اجلاس منعقد کرنے کے بجائے چین کے ساتھ جاری کشیدگی کو کم کرنے کی کوشش کرنی چاہئے۔تاہم دوسری جانب امریکی صدر جو بائیڈن نے چینی صدر شی کے دو طرفہ میٹنگ کو ٹھکرائے جانے سے متعلق خبروں کو غلط بتایا ہے۔مسٹر بائیڈن نے نامہ نگاروں کو بتایا کہ میڈیا میں یہ خبرآر ہی ہیں کہ مسٹر جن پنگ نے فون پر گفتگو کے دوران ان کی (جو بائیڈن کی) دو طرفہ ملاقات کی تجویز کو مسترد کر دیا جو کہ سراسر غلط ہے۔
