بیجنگ۔ چین کے وزیر خارجہ وانگ یی نے آج کہا کہ چین اور امریکہ کے تعلقات اس وقت بہت کشیدہ ہیں۔ جمعرات کو چین۔امریکہ تھنک ٹینک میڈیا فورم کے نمائندوں کیساتھ گفتگو کے دوران وانگ نے کہا کہ دونوں ممالک کے مابین سفارتی تعلقات استوار ہونے کے بعد سے کبھی اس طرح کے خراب تعلقات نہیں رہے ہیں۔وزارت خارجہ کے پریس ریلیز میں انہوں نے کہا کہ چین اور امریکہ کے تعلقات کو دونوں ممالک کے درمیان دو طرفہ روابط استوار ہونے کے بعد سے سب سے زیادہ سنگین چیلنج کا سامنا ہے۔ انہوں نے کہا کہ کچھ امریکی سیاستدان چین کو مخالف امریکہ اور یہاں تک کہ دشمن کے طور پر پیش کرنے کی کوشش کر رہے ہیں کیونکہ وہ چین کی ترقی اور دونوں ممالک کے باہمی تعاون کو تباہ کرنا چاہتے ہیں۔