بیجنگ : چین کی حکومت نے شہریوں کو ہدایت کی ہے کہ وہ ہنگامی حالات کے پیشِ نظر روز مرہ کے استعمال میں آنے والی اشیائے ضروریہ کو ذخیرہ کر لیں۔ یہ ہدایت سبزی کی قیمتوں میں حالیہ اضافے اور ترسیل میں کمی کے خدشے کے بعد سامنے آئی ہیں۔وزارتِ تجارت نے پیر کی شب ایک بیان میں کہا ہے کہ حکام اشیا کی ترسیل اور قیمتوں کے استحکام کو یقینی بنانے کے لیے اپنا کردار ادا کریں اور اشیا کی ترسیل میں کسی بھی مشکل کی صورت میں پیشگی اطلاع کریں۔چین میں گزشتہ ہفتے کھیرے، پالک اور بروکولی (گوبھی کی ایک قسم) کی قیمتوں میں دو گنا اضافہ ہوا تھا۔ صوبے شین ڈونگ میں سبزیوں کی قیمتوں پر نظر رکھنے والے ادارے کے اعداد و شمار کے مطابق ایک کلو گوشت کے مقابلے میں پالک زیادہ مہنگی ہوگئی ہے جو 16 یان سے زیادہ میں فروخت ہو رہی ہے۔چین میں کورونا کے بڑھتے کیسز کے بعد لاک ڈاؤن اور غیر معمولی بارش کے نتیجہ میں ہوئے نقصان کے باعث سبزیوں کی ترسیل متاثر ہونے کے خدشے اور قیمتوں میں مزید اضافے کے امکانات ظاہر کیے جا رہے ہیں۔میڈیا کے مطابق اشیا ذخیرہ کرنے سے متعلق چین کی وزارتِ تجارت کی جانب سے جاری کردہ ہدایت سوشل میڈیا پر گردش کرنے والی ان خبروں کے بعد سامنے آئی ہیں جن میں کہا جا رہا تھا کہ تائیوان کے ساتھ کشیدگی بڑھنے کے امکانات ہیں۔چین کی حکومت کے حمایت یافتہ اخبار اکنامک ڈیلی نے کہا ہیکہ انٹرنیٹ پر معلومات پھیلانے والے بے بنیاد معلومات کا پرچار کر رہے ہیں جبکہ وزارتِ تجارت کی ہدایات شہریوں کو کرونا لاک ڈاؤن کی صورت میں مشکلات سے نکالنے کیلئے ہے۔
سعودی حکام نے کہا کہ مؤثر اجازت نامہ کے بغیر کسی کو عمرے یا نماز کیلئے داخلے کی اجازت نہیں ہوگی۔