بیجنگ۔13 جون (سیاست ڈاٹ کام) چین کے دارالحکومت میں کورونا وائرس نے دوبارہ سر اْٹھانا شروع کر دیا ہے جس کے بعد دو اہم مارکٹس بند اور اجتماعات پر پابندی لگا دی گئی۔میڈیا کے مطابق بیجنگ میں کورونا وبا کے ختم ہونے کے دو ماہ بعد 11 افراد میں کورونا وائرس کی تشخیص ہونے پر اعلیٰ حکام الرٹ ہوگئے اور فوری طور پر دارالحکومت کی دو اہم مارکٹوں کو بند کر دیا گیا اور بچوں کی اسکولوں میں واپسی بھی روک دی گئی۔علاوہ ازیں بیجنگ کی انتظامیہ نے کھیلوں کے تمام یونٹس بھی معطل کردیئے اور 4 سے زائد افراد کے ایک ساتھ ریستورانوں میں جانے پر بھی پابندی عائد کر دی گئی ہے۔ یہ پابندیاں عارضی ہیں تاہم واضح نہیں کہ ان کی میعاد کتنی ہوگی۔مقامی میڈیا نے دعویٰ کیا ہے کہ جن دو مرکزی مارکٹوں کو بند کر کے پولیس کو تعینات کیا گیا ہے وہیں سے کورونا وائرس پھیلنے کا امکان ظاہر کیا گیا ہے۔ اگر یہ نئے کیسز سامنے نہیں آتے تو بیجنگ میں اسکولوں میں بچوں کی آمد شروع ہوجاتی۔
