بیجنگ :چین نے اپنی بحریہ کی طاقت اور استعداد میں اضافے کے لیے نیوکلیئر توانائی سے چلنے والا طیارہ بردار جہاز بنانے کا فیصلہ کیا ہے۔ فوج کے قریبی ذرائع کے حوالے سے دعویٰ کیا گیا کہ رواں برس کے اوائل میں 2 سال کی تاخیر کے بعد دوبارہ تیاری کے مراحل سے گزرنے والا چوتھا طیارہ بردار جہاز نیوکلیئر توانائی سے چلنے والا ہو گا۔ ساؤتھ چائنا مارننگ پوسٹ نے اپنی رپورٹ میں انکشاف کیا کہ چین کا چوتھا طیارہ برادر جہاز اپنی تکنیک کے لحاظ سے منفرد ہوگا، اور اس میں استعمال کردہ ٹیکنالوجی ماضی میں کسی اور جہاز میں استعمال نہیں کی گئی ہوگی۔ تاحال چینی فوج یا حکومت کی جانب سے چوتھے طیارہ بردار جہاز کے نیوکلیئر توانائی سے چلنے کا دعویٰ سامنے نہیںآیا ہے اور نہ ہی اس رپورٹ کی تردید کی گئی ہے۔اس وقت چین کے پاس دو طیارہ بردار جہاز موجود ہیں اور تیسرا بھی بیڑے میں شامل ہونے کو تیار ہے، جب کہ 2 سال کی تاخیر کے بعد اب چوتھے طیارہ بردار جہاز کی تیاری بھی شروع ہوگئی ہے۔