بیجنگ،9 نومبر (یو این آئی ) چین نے امریکہ کو نایاب معدنیات کی برآمد پرعائد پابندی ہٹا دی، یہ معطلی آج سے مؤثر ہوگی اور ایک سال تک برقرار رہے گی۔ غیر ملکی میڈیا رپورٹ کے مطابق چین نے امریکہ کے ساتھ جاری تجارتی تنازعات کے تناظر میں نایاب معدنیات کی برآمد پر عائد پابندیوں میں نرمی کا اعلان کیا ہے ۔ یہ اقدام چین کے وزارت تجارت کی جانب سے جاری کیا گیا، جس کے تحت نایاب معدنیات سمیت دیگر اہم معدنیات کی برآمد کے لیے عام اجازت نامے جاری کیے جائیں گے ۔ رپورٹ کے مطابق یہ پابندیوں میں جزوی نرمی ہے ، جو امریکہ اور چین کے درمیان حالیہ تجارتی معاہدوں کا نتیجہ ہے ، لیکن تمام پابندیاں مکمل طور پر ختم نہیں ہوئیں۔ پہلے مرحلے میں گیلئم، جرمانیم، اینٹمونی اور سپر ہارڈ میٹریلز سے متعلق دوہرے استعمال کی اشیاء کی برآمد پر عائد پابندی کو معطل کر دیا، چینی وزارتِ تجارت کے مطابق یہ معطلی آج سے مؤثر ہوگی اور ایک سال تک برقرار رہے گی۔ ماہرین کا کہنا ہے کہ چین کا یہ اقدام بیجنگ اور واشنگٹن کے درمیان جاری کشیدگی میں ایک موڑ ثابت ہوسکتا ہے۔