بیجنگ: 28 اگست (یو این آئی) چین میں دوسری جنگ عظیم کے خاتمے کو 80 سال مکمل ہونے پر فوجی پریڈ کی تیاریاں جاری ہیں جس میں 26 عالمی رہنما ایک ساتھ نظر آئیں گے ۔ خبر رساں ایجنسی اے پی کی رپورٹ کے مطابق شمالی کوریا کے سربراہ کم جونگ اُن اگلے ہفتے فوجی پریڈ میں شرکت کیلیے چھ سال بعد پہلی بار چین کا دورہ کریں گے ۔ وہ 2011 میں اقتدار سنبھالنے کے بعد پہلی بار عالمی رہنماؤں کے درمیان نظر آئیں گے ۔ چین کے دارالحکومت بیجنگ میں چہارشنبہ3 ستمبر 2025 کو دوسری جنگ عظیم کے خاتمہ کی 80ویں سالگرہ کے موقع پر خصوصی فوجی پریڈ کا انعقاد کیا جائے گا۔ روس کے صدر ولادیمیر پیوٹن بھی ان 26 غیر ملکی رہنماؤں میں شامل ہیں جو فوجی پریڈ میں شرکت کریں گے ۔ شمالی کوریا کی سرکاری خبر رساں ایجنسی نے تصدیق کی کہ کم جونگ ان تقریب میں شرکت کیلیے چینی صدر شی جن پنگ کی دعوت پر چین کا دورہ کریں گے ۔ کم جونگ ان کب تک چین میں رہیں گے اور شی جن پنگ سمیت کن عالمی رہنماؤں سے ملاقات کریں گے تاہم اس بارے میں تفصیلات نہیں بتائی گئیں۔ واضح رہے کہ امریکہ یا بڑے مغربی یورپی ممالک سے کسی رہنما کو فوجی پریڈ میں شرکت کیلئے مدعو نہیں کیا گیا۔
