بیجنگ: ہمارے نظام فلکی کا ایک سورج ہے لیکن زمین سے بیک وقت آسمان پر 7 سورجوں کا نا قابل یقین مشاہدہ کیا گیا ہے ۔ یہ نا قابل فراموش حیرت انگیز منظر چین میں دیکھا گیا اور ایک خاتون کی جانب سے بنائی گئی ویڈیو میں سات سورجوں کو ایک قطار میں دیکھا جا سکتا ہے جو سوشل میڈیا پر تیزی سے وائرل ہو رہی ہے ۔غیر ملکی میڈیا کے مطابق یہ حیرت انگیز ویڈیو چینگڈو اسپتال میں آنے والی وانگ نامی خاتون نے بنائی ہے جس میں 7 سورج ایک قطار میں ہیں۔ وانگ نے اس منظر کو نا قابل فراموش قرار دیا۔خاتون کا کہنا تھا کہ یہ ناقابل یقین نظارہ متعدد زاویوں سے نظر آ رہا ہے ، جس کی وجہ سے بہت سے لوگ حیران ہیں کہ کیا وہ کسی کائناتی بے ترتیبی کا مشاہدہ کر رہے ہیں۔تاہم ماہرین نے اس حیرت انگیز منظر کی وضاحت کرتے ہوئے بتایا ہے کہ یہ کوئی فلکیاتی واقعہ نہیں ہے بلکہ نظروں کا دھوکہ (آپٹیکل الوژن) ہے ۔ سورجوں کی عجیب وغریب ترتیب اسپتال کی کھڑکیوں کے پرت دار شیشے کے ذریعے روشنی کے اخراج کی وجہ سے ہوئی ، جس سے ہر پین پر سورج کی مجازی تصاویر پیدا ہوئیں۔واضح رہے کہ اس قسم کے منظر کو ’’پرہیلین‘‘ کے نام سے جانا جاتا ہے ، جو ماحولیاتی بصری دھوکے کی ایک قسم ہے ۔ ایسا اس وقت ہوتا ہے ، جب سورج کی روشنی زمین کی فضا میں برف کے کرسٹل کے ساتھ تعامل کرتی ہے ۔دوسری جانب اس ویڈیو کے سوشل میڈیا پر وائرل ہوتے ہی صارفین کی جانب سے منفرد اور دلچسپی کے ساتھ پرتجسس تبصرے کئے گئے ہیں۔
