واشنگٹن: وائٹ ہاؤس کے ترجمان نے کہا ہے کہ تائیوان پر امریکی پالیسی میں کوئی تبدیلی نہیں آئی ہے۔ وائٹ ہاؤس نے یہ بات اپنے وضاحتی بیان میں کہی ہے۔ وائٹ ہاؤس کے ترجمان کا دفاعی بیان امریکی صدر جوبائیڈن کے اس بیان کے فوری بعد آیا ، جس میں انہوں نے کہا تھا کہ امریکہ تائیوان کا ہرقیمت پر دفاع کرے گا۔ عالمی خبر رساں اداروں کے مطابق ترجمان وائٹ ہاؤس نے اپنے وضاحتی بیان میں کہا ہے کہ صدر ہماری پالیسی میں کسی تبدیلی کا اعلان نہیں کر رہے اور ہماری پالیسی میں کوئی تبدیلی نہیں آئی ہے۔ صدر جوبائیڈن کے تائیوان کے دفاع کے بیان کے بعد واشنگٹن بیجنگ کے غصے کو کم کرنے کے لیے کوشاں ہے۔ واضح رہے کہ امریکی صدر جوبائیڈن نے امریکی نشریاتی ادارے سی این این کے زیر اہتمام منعقدہ ایک تقریب میں پوچھے جانے والے سوال کے جواب میں کہا تھا کہ امریکہ تائیوان کا دفاع کرے گا۔ صدر جوبائیڈن کے بیان کے بعد چین نے خبردار کرتے ہوئے کہا تھا کہ امریکہ کو تائیوان کے معاملے پر احتیاط سے کام لینا چاہیے۔ چین کی وزارت خارجہ کے ترجمان نے یہ بھی کہا تھا کہ بنیادی مفادات پر چین کے پاس سمجھوتاکرنے کی کوئی گنجائش نہیں ہے۔
