ڈر ہے کہ وزیر اعظم اس کا بھی افتتاح نہ کر ڈالیں! راہول گاندھی کا طنز
نئی دہلی :کانگریس کے سابق صدر راہول گاندھی نے لائن آف کنٹرول (ایل اے سی) پر چین کی فوج کی بڑھتی ہوئی سرگرمیوں پر ایک بار پھر وزیر اعظم نریندر مودی کو نشانہ بنایاہے۔ انہوں نے اس کے لیے براہ راست وزیر اعظم مودی کو ذمہ دار ٹھہرایا ہے۔ راہول گاندھی نے ٹوئٹ کرتے ہوئے کہا کہ چین ہمارے ملک میں اسٹریٹیجک پل بنا رہا ہے۔ وزیر اعظم کی خاموشی سے پی ایل اے کے حوصلے بلند ہو رہے ہیں۔ اب خدشہ ہے کہ وزیر اعظم کہیں اس پل کا بھی افتتاح کرنے نہ پہنچ جائیں۔ ہندوستان اور چین کے درمیان مشرقی لداخ کی سرحد پر ایک بار پھر کشیدگی بڑھنے لگی ہے۔ اس کشیدگی میں اضافے کے پیچھے چین کی نئی حرکت ہے۔ چین پینگونگ تسو جھیل کے کنارے ایک پل بنا رہا ہے۔ یہ پل 400 میٹر سے زیادہ لمبا ہے اور ایک بار مکمل ہونے سے چین کو خطے میں ایک اہم فوجی برتری حاصل ہو جائے گی۔ یہ پل آٹھ میٹر چوڑا ہے اور پینگونگ تسو جھیل کے شمالی کنارے پر چینی فوج کے اڈے کے بالکل جنوب میں واقع ہے۔ یہاں چینی اسپتال اور فوجیوں کی رہائش گاہیں بھی ہیں۔ یہ مشرقی لداخ کے قریب پینگونگ تسو جھیل کے ساتھ ایک ایسا علاقہ ہے، جس پر ہندوستان اور چین کے درمیان تنازعہ پیدا ہو رہا ہے۔میڈیا رپورٹس کے مطابق 16 جنوری کی سیٹلائٹ سے لی گئی تصاویر میں دکھایا گیا ہے کہ چینی تعمیراتی کارکن ایک بھاری کرین کا استعمال کرتے ہوئے پل کے ستونوں کو کنکریٹ کے سلیب سے جوڑنے میں مدد کر رہے ہیں۔ راہول گاندھی نے اپنے ٹوئٹ میں اس پل کا ذکر کیا ہے۔