مزید قونصل خانے بند کرنے ٹرمپ کی دھمکی، امریکی اقدام سیاسی اشتعال انگیزی : چین
واشنگٹن: امریکہ کے صدر ڈونالڈ ٹرمپ نے ملک میں قائم چین کے مزید مشنوں کو بند کرنے کے اشارے دیئے ہیں۔ ٹرمپ نے چہارشنبہ کو وہائٹ ہاؤس میں پریس کانفرنس کے دوران ملک میں واقع چین کے مشینوں کو بند کرنے کے منصوبے سے متعلق پوچھے گئے سوال کے جواب میں کہا ‘‘جہاں تک فاضل سفارت خانوں کو بند کرنے کی بات ہے ، یہ ہمیشہ ممکن ہے ۔واضح رہیکہ امریکی حکومت کی طرف سے ہیوسٹن میں چینی قونصل خانے کو بند کرنے کے حکم اور اس پر چینی حکومت کی جانب سے سخت جوابی اقدامات کی دھمکی کے بعد دنیا کی دو بڑی معیشتوں کے درمیان کشیدگی مزید شدت اختیار کرگئی ہے۔چین نے امریکہ کے فیصلے کو آئندہ نومبر میں ہونے والے صدارتی انتخابات میں ٹرمپ انتظامیہ کی ناکامی کا ٹھیکرا بیجنگ کے سر پھوڑنے کی کوشش قرار دیا ہے۔ جبکہ اس تازہ پیش رفت سے صرف ایک دن قبل امریکہ نے چین کی ‘دھونس‘ کے خلاف بین الاقوامی برادری سے ایک عالمی اتحاد قائم کرنے کی اپیل کی تھی۔امریکی محکمہ خارجہ نے چین پر جاسوسی کا الزام عائد کرتے ہوئے چہارشنبہ کے روز کہا کہ ‘امریکی حقوق املاک دانش اور امریکیوں کی نجی معلومات کے تحفظ کے لیے‘ امریکی انتظامیہ نے چین کو حکم دیا ہے کہ وہ ہیوسٹن کا اپنا قونصل خانہ 72 گھنٹے کے اندر بند کردے۔ امریکی محکمہ خارجہ کے ترجمان کا کہنا تھا کہ ’’ہم چین کی جانب سے اپنی خودمختاری اور اپنے لوگوں کو دھمکانے کے سلسلے کو برداشت نہیں کر سکتے، اسی طرح ہم چین کی غیرمنصفانہ تجارتی پالیسیوں، امریکی نوکریوں کی چوری اور دوسرے قابلِ مذمت رویے کو برداشت نہیں کر سکتے۔ “صدر ڈونالڈ ٹرمپ نے بھی میڈیا سے بات چیت کرتے ہوئے دھمکی دی کہ مزید قونصل خانے بھی بند کیے جاسکتے ہیں ’’یہ ہمیشہ ممکن ہے۔ چین نے امریکی فیصلے کا سخت جواب دینے کا اعلان کردیا ہے۔
چینی وزارت خارجہ نے اس فیصلے کو ’’اشتعال انگیز اور بلا جواز” قرار دیتے ہوئے اس فیصلے کو غیر معمولی اور ایسا فیصلہ قرار دیا جس کی مثال نہیں ملتی۔ چینی وزارت خارجہ کی ترجمان ہو ا چن ینگ نے ٹوئٹر پر لکھا’’یقینی طور پر ہم اس کا سخت جواب دیں گے۔” چین میں امریکہ کا ایک سفارت خانے کے علاوہ پانچ قونصل خانے ہیں۔ اخبار نے امریکی صدر ڈونالڈ ٹرمپ پر سیاست کرنے کا الزام بھی لگایا۔ اخبار نے لکھا ہے’’نومبر میں ہونے والے صدارتی انتخابات نے واشنگٹن کو پاگل بنادیا ہے۔”چین کے ایک اور سرکاری اخبار چائنا ڈیلی نے امریکی اقدام کو ’’عالمی اسٹیج پر چین کو ایک بدخواہ کردار کے طور پر پیش کرنے کی کوشش قراردیا تاکہ اسے بین الاقوامی برادری کیلئے اچھوت بنا دیا جائے‘‘۔اخبار مزید لکھتا ہے’’چونکہ وہ صدارتی انتخابات میں اپنے حریف سے پیچھے ہوتے جارہے ہیں … لہٰذا امریکی رہنما چین کو شیطان کا ایجنٹ کے طورپر پیش کرنے کے تمام حربے آزمارہے ہیں۔”واشنگٹن میں چینی سفارتخانے نے ہیوسٹن قونصل خانے کو بند کرنے کے حکم کو ’’سیاسی اشتعال انگیزی‘‘ قراردیتے ہوئے امریکہ سے اپنے فیصلے کو’’فوراً واپس لینے‘‘ کی اپیل کی۔ سفارتخانے نے اپنے آفیشیل ٹوئٹر اکاونٹ پر لکھا’’اب بریک لگانے اور صحیح سمت میں آگے بڑھنے کا وقت آگیا ہے۔”