لکھنؤ: بی ایس پی کی سربراہ مایاوتی نے آج بابا صاحب ڈاکٹر بھیم راؤ امبیڈکر کو ان کی برسی کے موقع پر خراج عقیدت پیش کیا۔ اس موقع پر انہوں نے مرکزی حکومت کی ’پردھان منتری غریب کلیان ان یوجنا‘ پر نکتہ چینی کی۔امبیڈکر کو ان کے 67ویں ’پرینیروان دیوس‘ پر خراج عقیدت پیش کرتے ہوئے، بی ایس پی سربراہ مایاوتی نے سوشل میڈیا پلیٹ فارم ایکس پر لکھا ک تقریباً 140 کروڑ کی وسیع آبادی والے ہندوستان کے غریبوں، مزدوروں، دلتوں، آدیواسیوں، انتہائی پسماندگان سمیت نظرانداز کئے گئے ’بہوجنوں‘ کے مسیحا اور ملک کے انسان دوست اور مساوات پسند آئین کے مرتب بھارت رتن ڈاکٹر بھیم راؤ امبیڈکر کو ان کے پرینروان دیوس پر زبردست خراج عقیدت۔ انہوں نے مزید لکھا کہ ملک کے 81 کروڑ سے زیادہ غریبوں کو کھانا کھلانے کیلئے سرکاری خوراک پر انحصار کرنے کی حالت نہ تو آزادی کا خواب تھا اور نہ ہی ان کیلئے فلاحی آئین بناتے وقت بابا صاحب ڈاکٹر بھیم راؤ امبیڈکر نے یہ سوچا تھا یہ صورتحال انتہائی افسوسناک ہے۔