سری نگر ۔نیشنل کانفرنس کے صدر اور سابق چیف منسٹر ڈاکٹر فاروق عبداللہ نے الیکشن کمیشن کی طرف سے غیر مقامی لوگوں کو یہاں ووٹ ڈالنے کا حق دینے کے فیصلے پر غور وخوض کرنے کے لئے22 اگست پیرکو اپنی رہائش گاہ پرکل جماعتی اجلاس طلب کیا ہے ۔ذرائع کے مطابق اس اجلاس میں بی جے پی کو چھوڑ کر جموں وکشمیر کی تمام سیاسی پارٹیوں کو شرکت کرنے کی دعوت دی گئی ہے اور اس میں الیکشن کمیشن کے مذکورہ حالیہ فیصلے کے متعلق مستقبل کے لئے لائحہ عمل پر غور کیا جائے گا۔ جموں وکشمیر نیشنل کانفرنس کے ٹویٹر ہینڈل پر ایک ٹویٹ میں کہا گیا ڈاکٹر فاروق عبداللہ نے تمام سیاسی جماعتوں کے لیڈروں کو ایک ملاقات کے لئے مدعو کیا ہے تاکہ ووٹر لسٹوں میں غیر مقامی افراد کو شامل کرنے کے جموں و کشمیر حکومت کے حالیہ اعلان پر تبادلہ خیال کیا جا سکے ۔
