ممبئی ۔ بالی ووڈ کنگ شاہ رخ خان کی آنے والی فلم ڈنکی ریلیز سے قبل ہی فلمی شائقین کی جانب سے تنقید کا نشانہ بن گئی ہے ۔ رواں برس ایک کے بعد ایک شاہ رخ خان کی دو فلموں پٹھان اور جوان کی باکس آفس پر شاندار کامیابی کے بعد مداحوں کو ان کی تیسری فلم ڈنکی کا بہت ہی بے چینی سے انتظار ہے۔ فلم ڈنکی کا پہلا ٹیزر شاہ رخ خان کی سالگرہ کے موقع پر2 نومبر کو ریلیز کیا گیا ہے جسے مداحوں کی جانب سے بہت پسند کیا گیا۔ تاہم اب سوشل میڈیا پر فلم کے حوالے سے یہ بات سامنے آئی ہے کہ فلم ڈنکی ہالی ووڈ فلم ڈیزئرٹو کی نقل ہے۔ ہالی ووڈ فلم ڈیزئرٹو2015ء میں ریلیزہوئی جس کی کہانی غیر قانونی امیگریشن پر مبنی تھی جس میں ایک میکسیکن تارکین وطن کے ایک ایسے گروہ کو دکھایا گیا تھا جوکہ غیر قانونی طور پر امریکی سرحد عبور کرکے بہتر زندگی کی تلاش میں رہتا ہے۔ شائقین راج کمار ہیرانی پر تنقید کررہے ہیں اور کہہ رہے ہیں ڈنکی کی نہ صرف کہانی فلم ڈیزئرٹو جیسی ہے بلکہ فلم کے تمام مناظر بھی اسی ہالی ووڈ فلم کی نقل ہیں۔ واضح رہے کہ راج کمار ہیرانی کی ہدایت کاری میں بننے والی فلم ڈنکی کی کہانی 5 دوستوں کے گروہ کے ارد گرد گھومتی ہے جو لندن جا کر وہاں رہائش اختیار کرنے کے خواہاں ہوتے ہیں۔اس کامیڈی ڈرامہ فلم ’ڈنکی‘ کی کہانی میں بھی غیر قانونی طور پر بیرون ملک جانے کے مسئلے کو موضوع بنایا گیا ہے۔
