میکسیکو سٹی،4ستمبر(سیاست ڈاٹ کام)کیربیائی ملک بہاماس میں طاقتور ترین سمندری طوفان’ ڈورین‘ نے تباہی مچادی۔ طوفانی بارشوں اور ہواؤں کے باعث مختلف حادثات میں کم از کم 7افرادکی ہلاکت کی اطلاع ہے ۔بہاماس کے وزیراعظم نے طوفان کی تباہ کاریوں کو بدترین اور ناقابل تصور قرار دے دیا جبکہ سمندری طوفان کا رخ امریکی ریاست فلوریڈا کی جانب ہے ، فلوریڈا کے مشرقی ساحلوں پر تیز ہوائیں چل رہی ہیں۔طوفان کے پیش نظر فلوریڈا کے ساحلی علاقوں سے لاکھوں افراد کو محفوظ مقامات پر منتقل ہونے کی ہدایت جاری کردی گئی ہیں۔سمندری ‘طوفان ڈورین’ کی شدت 5 سے کم ہو کرزمرہ 3 پر آگئی ،طوفان آج رات یاکل تک امریکی ریاست فلوریڈا کے قریب پہنچے گا۔امریکی نیشنل ہریکین سینٹر کے مطابق طوفان ابھی بہاماس میں ہی موجود ہے ، طوفان کے باعث چلنے والی ہواؤں کی رفتار کم ہو کر 205 کلومیٹر فی گھنٹہ ہو گئی ہے ۔طوفان کے پیش نظر امریکہ میں 2700 پروازیں منسوخ کردی گئی ہیں، طوفان ڈورین کا خطرناک حد تک فلوریڈا کے قریب آنے کا امکان ہے جس کے باعث امریکہ کی جنوب مشرقی ساحلی پٹی پر شدید بارش ہوگی جبکہ فلوریڈا کے بعد طوفان جارجیا اور ساؤتھ کیرولائنا کا رخ کرے گا۔