ڈبلیو ایچ او کا فنڈ روکنے کیلئے یہ صحیح وقت نہیں:اقوام متحدہ کے سکریٹری جنرل گوٹریس
واشنگٹن۔15 اپریل (سیاست ڈاٹ کام) صدر امریکہ ڈونالڈ ٹرمپ نے کہا ہے کہ انہوں نے اپنی انتظامیہ کو امریکہ کی جانب سے عالمی ادارہ صحت (ڈبلیو ایچ او) کو دئیے جانے والے فنڈ کو روکنے کی ہدایت دی ہے ۔ ٹرمپ نے ڈبلیو ایچ او پر کورونا وائرس کووڈ۔ 19کے پھیلنے سے روکنے میں ناکام رہنے اور اس سے متعلق صحیح معلومات چھپانے کا الزام لگایا ہے ۔ انہوں نے منگل کو وائٹ ہاؤز میں باقاعدہ پریس بریفنگ کے دوران کہا کہ آج میں اپنی انتظامیہ کو ڈبلیو ایچ او کی فنڈنگ کوروکنے کی ہدایت دے رہا ہوں۔کووڈ۔ 19 کے حوالہ سے بدنظمی اور اس کے بڑھتے ہوئے انفیکشن کو چھپانے میں ڈبلیو ایچ او کے کردار کا جائزہ لیا جائے گا۔ ٹرمپ نے کہا کہ کورونا وائرس کے حوالہ سے ڈبلیو ایچ او کی جوابدہی طے کی جانی چاہئے ۔امریکی صدر نے کہا کہ چین میں کورونا وائرس کیسیس کے آغاز کے ساتھ ہی ڈبلیو ایچ او اسے قابو کرنے میں ناکام رہا اور اس سے متعلق اصل صورت حال کو مسلسل چھپاتا رہا۔انہوں نے کہا کہ امریکہ ڈبلیو ایچ او کوسالانہ 40 سے 50 کروڑ ڈالر کی مالی امداد فراہم کرتا ہے ۔ ٹرمپ نے کہا کہ اگر ڈبلیو ایچ او نے وقت پر طبی ماہرین کو چین میں بھیج کر اصل صورت حال کا اندازہ کیا ہوتا اور اس وبا کے سلسلے میں چین کی جانب سے شفافیت میں کمی پر عالمی برادری کو آگاہ کیا ہوتا تو اس وبا کو روکا جا سکتا تھا ۔ اس سے ہزاروں لوگوں کی زندگی بچائی جا سکتی تھی اور عالمی معیشت کو ہونے والے نقصان کو بھی بچا جا سکتا تھا۔قابل غور ہے کہ عالمی وبا کووڈ۔ 19نے امریکہ میں بھیانک شکل اختیارکرلی ہے ۔ جان ہاپکنز یونیورسٹی کی جانب سے جاری تازہ ترین اعداد و شمار کے مطابق امریکہ میں کورونا وائرس سے مرنے والوں کی تعداد 25 ہزار سے تجاوز کرکے 25992 ہوگئی ہے جبکہ 608458 افراد اس سے متاثر ہوئے ہیں۔ اقوام متحدہ کے سکریٹری جنرل انتونیو گوٹریس نے کہا ہے کہ عالمی ادارہ صحت (ڈبلیو ایچ او) کا فنڈ روکنے کے لئے یہ صحیح وقت نہیں ہے ۔مسٹر گوٹریس کا یہ بیان امریکی صدر ڈونالڈ ٹرمپ کے اس بیان کے بعد آیا ہے ، جس میں انہوں نے کہا ہے کہ انہوں نے امریکی انتظامیہ کو ڈبلیو ایچ او کو امریکہ کی جانب سے دیئے جانے والے فنڈ کو روکنے کی ہدایت دی ہے ۔انہوں نے یہ وقت ڈبلیو ایچ او یاکووڈ -19 کے خلاف جنگ لڑنے والے کسی دوسرے انسان ساختہ تنظیم کی مہم کے ذریعہ میں کمی کرنے کا وقت نہیں ہے ، جیسا کہ میں نے پہلے کہا ہے ، یہ وقت اس وبا کو روکنے کے لئے بین الاقوامی برادری کے متحد ہونے کا ہے۔
