بائیڈن پر تنقید‘جلد ہی کورونا ویکسین کی تیاری کا عزم‘ آج کیلیفورنیا کا دورہ
واشنگٹن :امریکہ میں اس سال نومبر میں ہونے والے صدارتی انتخابات کے لیے مہم زور وشور سے جاری ہے۔صدر ڈونلڈ ٹرمپ نے کل رات ریاست نیواڈا میں انتخابی ریالی سے خطاب کرتے ہوئے ایک بار پھر ڈیمو کریٹک پارٹی کو تنقید کا نشانہ بنایا۔ میڈیا کے مطابق ٹرمپ نے کہا کہ وہ ریاست نیواڈا میں اپنے مدمقابل جو بائیڈن کی برتری ختم کر دیں گے۔ عوامی جائزوں کے مطابق ڈیمو کریٹک اْمیدوار جو بائیڈن کو نیواڈا میں ٹرمپ کے مقابلے میں برتری حاصل ہے۔صدر ٹرمپ نے ایک بار پھر اس عزم کا اظہار کیا کہ امریکہ بہت جلد کرونا وبا سے بچاؤ کے لیے ویکسین تیار کر لے گا۔ میڈیاکے مطابق ایک جانب صدر کرونا وبا کے جلد خاتمے اور ویکسین کی تیاری کی نوید سنا رہے تھے تو وہیں صدر ٹرمپ نے نسبتاً کم گنجائش والی جگہ پر ہزاروں کے مجمع سے خطاب کیا۔نیواڈا کے شہر رینو کے ایئر پورٹ کے باہر جلسہ گاہ میں شرکا کے لیے سماجی فاصلوں کی پابندی کرنا مشکل تھا اور لوگ ایک دوسرے کے قریب کھڑے تھے جب کہ کئی افراد نے ماسک بھی نہیں پہنے ہوئے تھے۔ٹرمپ نے اپنے نوے منٹ کے خطاب کے دوران ایک بار پھر ڈیمو کریٹک پارٹی پر تین نومبر کے الیکشن چرانے کا الزام لگایا۔صدر نے کہا کہ ڈیمو کریٹک پارٹی صرف دھاندلی کے ذریعے ہی الیکشن جیت سکتی ہے۔انہون نے ڈاک کے ذریعے ووٹنگ پر تحفظات کو دہراتے ہوئے ڈیمو کریٹک پارٹی سے تعلق رکھنے والے مقامی گورنر کو بھی تنقید کا نشانہ بنایا۔صدر ٹرمپ نے کہا کہ ڈیمو کریٹک گورنر اسٹیو سسولک کے ہوتے ہوئے ریاست میں ڈاک کے ذریعے ووٹنگ پر اْنہیں تحفظات ہیں۔اپنے خطاب کے دوران صدر نے جو بائیڈن کی انتخابی مہم کو بھی سست قرار دیتے ہوئے مجمع سے سوال کیا کہ “کیا آپ جانتے ہیں کہ بائیڈن کہاں ہیں۔ وہ اپنے گھر کے تہہ خانے میں ہیں۔نیواڈا ریاست میں صدر ٹرمپ کو 2016 کے صدارتی انتخابات میں بہت کم ووٹوں سے شکست ہوئی تھی۔ وائٹ ہاؤس نے ہفتے کو اعلان کیا ہے کہ صدر ٹرمپ پیر کو کیلی فورنیا جائیں گے۔ جہاں وہ جنگلات میں لگی آگ سے ہونے والے نقصانات کا جائزہ لیں گے۔ادھر ڈیمو کریٹک پارٹی کے صدارتی اْمیدوار جو بائیڈن بھی اپنی صدارتی مہم جاری رکھے ہوئے ہیں۔اپنی انتخابی مہم کے دوران جو بائیڈن کرونا کے خلاف صدر کے اقدامات کو ناکافی قرار دینے کے علاوہ امریکہ میں پرتشدد مظاہروں پر ٹرمپ انتظامیہ کے کردار پر سوال اْٹھاتے رہے ہیں۔ اسی دوران بائیڈن نے امریکہ کی مغربی ریاستوں کے جنگلات میں لگیآگ سے ہونے والے نقصانات کو ٹرمپ انتظامیہ کی ناقص حکمت عملی کا نتیجہ قرار دیا ہے۔