بھوپال : سابق وزیراعلی دگ وجے سنگھ نے بھی مدھیہ پردیش کے دارالحکومت بھوپال کے گووند پورہ علاقے میں آج ڈسٹرکٹ کانگریس کے ذریعہ منعقدہ احتجاج میں حصہ لیا اور اس دوران وہ ’’ آبی توپ ‘‘کی زد میں آگئے ۔ راجیہ سبھا کے رکن پارلیمنٹ مسٹر سنگھ اپنے حامیوں کے ساتھ ایک مظاہرے کے لئے گووند پورہ علاقے پہنچے تھے ۔ کانگریس نے الزام لگایا ہے کہ گووند پورہ صنعتی علاقے میں وشوکرما مندر کے قریب ایک نجی تنظیم کو 10،000 مربع فٹ اراضی دی جارہی ہے ۔ اس کے لئے درختوں کی کٹائی کا کام متعلقہ زمین پر بھی کیا گیا ہے ۔ مسٹر سنگھ کی سربراہی میں کارکنان حکومت اور انتظامیہ کے اس اقدام کے خلاف احتجاج کے دوران آگے بڑھ رہے تھے ، لیکن ڈپٹی انسپکٹر جنرل (ڈی آئی جی) ارشاد ولی کی سربراہی میں پولیس فورس پہلے ہی تعینات تھی۔ پولیس نے بھی بیریکیڈنگ کی تھی۔ مسٹر سنگھ بیریکیڈنگ عبور کرنے اور آگے بڑھنے کی کوشش کر رہے تھے لیکن مسٹر ولی نے خود انہیں آگے بڑھنے سے روک دیا۔ اس دوران کانگریس کارکنوں اور پولیس افسران کے مابین زبردست بحث ہوئی۔پولیس بھی سرگرم ہوگئی اور واٹر کینن کا استعمال کیا ، جس سے مسٹر سنگھ اور دوسری کانگریس کارکنوں کو آگے بڑھنے سے روکا گیا۔ اس کے بعد کارکنوں نے پولیس انتظامیہ کے خلاف نعرے بازی بھی کی۔ کانگریس کارکنوں کا الزام ہے کہ احتجاج کے دوران مسٹر ولی نے خود ہی ایک لاٹھی تھام کر مسٹر سنگھ کی طرف اشارہ کیا۔ انہوں نے پولیس افسر کے اس اقدام پر بھی تنقید کی۔
