دبئی ۔آئی سی سی مینز ٹی ٹوئنٹی ورلڈکپ سوپر 12 مرحلے میں ویسٹ انڈیز کے خلاف میچ سے قبل پیش آئے تنازعہ پر جنوبی افریقی وکٹ کیپر کوئنٹن ڈی کاک نے معافی مانگ لی۔کوئنٹن ڈی کاک نے جنوبی افریقی کرکٹ بورڈ کے بلیک لائیوز میٹرز(نسل پرستی کے خلاف) مہم سے اظہارِ یکجہتی کیلئے ایک گْھٹنے پر بیٹھنے کی ہدایت ماننے سے انکارکیا تھا اور میچ سے ہی دستبردار ہوگئے تھے۔اب کوئنٹن ڈی کاک نے اپنی ٹیم کے ساتھیوں اور مداحوں سے اپنے اس رویے کے لیے معافی مانگی ہے۔انہوں نے کہا کہ اگر میرے گْھٹنے ٹیکنے سے دوسروں کو تعلیم دینے میں مدد ملتی ہے اور دوسروں کی زندگیوں میں بہتری آتی ہے تو میں ایسا کرنے میں خوشی محسوس کروں گا۔ جنوبی افریقی کرکٹ بورڈ سے بات کرنے کے بعد کھلاڑی نے کہا کہ وہ اس سارے عمل کو بہتر طریقے سے سمجھ پائے ہیں اور اب اپنے ملک کے لیے کرکٹ میچ دوبارہ کھیلنا چاہتے ہیں۔اس میچ سے قبل جنوبی افریقی کرکٹرز اپنے انداز میں نسلی تعصب کیخلاف مہم میں کردار ادا کر رہے تھے، تاہم کرکٹ ساؤتھ افریقہ نے تمام کھلاڑیوں کو ایک جیسا عمل کرنے کی ہدایت دی تھی۔یادرہے کہ سیاہ فام افراد کے خلا ف دنیا بھر میںہونے والے ظلم اور تعصب کے خلاف اسپورٹس شعبے اپنی آواز بلند کررہے ہیں اور تقریباً ہر بڑے ایونٹ میں نسلی تعصب کے خلاف احتجاجاًً کچھ نہ کچھ کیا جارہاہے۔