عوام میں خوشی کی لہر، فرانس، بلجیم ، یونان اور اسپین میں تمام سرگرمیاں بحال ،برطانیہ میں لاک ڈاون جاری
پیرس ۔11مئی ( سیاست ڈاٹ کام )فرانس اور اسپین سمیت بیشتر یورپی ملکوں میں پیر سے لاک ڈاون میں نرمی کی جا رہی ہے جب کہ برطانیہ نے کرونا وائرس کا مزید پھیلاو روکنے کے لیے لاک ڈاون میں توسیع کا اعلان کیا ہے۔فرانسیسی خبر رساں ادارے ‘اے ایف پی’ کے مطابق فرانس، بیلجیم، یونان اور اسپین میں پیر سے لاک ڈاون میں نرمی پر عمل درآمد شروع ہو گا۔فرانس میں لگ بھگ آٹھ ہفتوں کے بعد پیر کی صبح سے شہریوں کو آزادانہ نقل و حرکت کی اجازت ہو گی۔ پرائمری اسکول ٹیچرز ایک مرتبہ پھر اسکولوں میں آ گئے ہیں جب کہ ہیئر ڈریسرز سمیت بعض دکانوں کو کھولنے کی اجازت دے دی گئی ہے۔لاک ڈاون میں نرمی کے باوجود فرانس میں ریستوران، تھیٹرز، سنیما اور بارز بدستور بند رہیں گے۔اتوار کو فرانس میں اپریل کے بعد سے سب سے کم یومیہ اموات رپورٹ ہوئی ہیں۔ اتوار کو کرونا وائرس کے شکار 70 افراد ہلاک ہوئے تھے۔یاد رہے کہ کرونا وائرس سے فرانس میں اب تک 26 ہزار سے زیادہ اموات ہو چکی ہیں جب کہ ملک بھر میں متاثرہ مریضوں کی تعداد ایک لاکھ 77 ہزار سے زیادہ ہے۔برطانیہ کرونا وائرس سے سب سے زیادہ متاثر ہونے والا یورپی ملک ہے جہاں اب تک 31 ہزار سے زیادہ افراد ہلاک اور دو لاکھ 19 ہزار سے زیادہ متاثر ہوئے ہیں۔ ہلاکتوں میں مسلسل اضافے کے پیشِ نظر وزیرِ اعظم بورس جانسن نے یکم جون تک لاک ڈاون میں توسیع کا اعلان کیا ہے۔انہوں نے کہا کہ برطانیہ میں کرونا وائرس کی دوسری لہر کا خدشہ ہے اس لیے فوری طور پر پابندیوں میں نرمی نہیں کی جا سکتی۔بورس جانسن نے کہا کہ برطانوی عوام کی طرز زندگی کے لیے لاک ڈاون کے مصائب برداشت کرنا مشکل ہے تاہم وبا کو کنٹرول کیے بغیر پابندیوں میں نرمی کرنا احمقانہ فیصلہ ہو گا۔یاد رہے کہ برطانوی وزیرِ اعظم بھی کرونا وائرس کا شکار ہوئے تھے اور وہ تین روز تک انتہائی نگہداشت کے وارڈ میں بھی رہ چکے ہیں۔بورس جانسن نے کہا کہ وہ رواں ماہ ایک مشروط منصوبہ پیش کریں گے جس کے تحت مرحلہ وار لاک ڈاون میں نرمی کی جائے گی۔ تاہم رواں ہفتے پابندیوں میں نرمی کرنے کا وقت نہیں ہے۔کرونا وائرس کا پھیلاوروکنے کے لیے اسپین کے مختلف شہروں میں عائد پابندیوں میں مرحلہ وار نرمی کی جا رہی ہے اور شہریوں نے رشتہ داروں سے ملاقات کے لیے منصوبے بھی بنا لیے ہیں۔وبا سے متاثرہ شہر میڈرڈ اور بارسلونا میں بدستور لاک ڈاون رہے گا جب کہ دیگر شہروں میں بعض دکانوں کو پیر سے کھولنے کی اجازت دے دی گئی ہے۔اسپین میں 26 ہزار سے زائد اموات رپورٹ ہو چکی ہیں اور یومیہ ہلاکتوں کی تعداد 200 سے کم ہو گئی ہیں۔ملک بھر میں دو لاکھ 24 ہزار سے زائد افراد کرونا وائرس کا شکار ہو چکے ہیں۔جرمنی میں عائد پابندیوں میں نرمی کے حوالے سے بے یقینی پائی جاتی ہے۔