کابل : کابل ائیر پورٹ سے مسافر لے جانے والی بین الاقوامی پروازوں میں اضافہ ہو گیا ہے۔ امریکہ، جرمنی اور فرانس سمیت دیگر ملکوں کے طیاروں میں بڑی تعداد میں شہریوں کا کابل سے انخلا جاری ہے۔امریکی محکمہ خارجہ کے مطابق کابل میں موجود تمام امریکی سفارتی اہلکاروں کو نکال لیا گیا ہے جبکہ دیگر سفارتی عملہ شہریوں کے انخلا میں معاونت کر رہا ہے۔وائٹ ہاؤس ترجمان نے کہا کہ بعض مسافروں کو ہراساں کیا گیا، یہ معاملہ طالبان کے ساتھ اٹھا دیا ہے۔ادھر پنٹگان میں میجر جنرل ٹیلر ہینک نے کہا کہ طالبان نے کابل سے امریکی انخلا کی کوششوں میں مداخلت نہیں کی،کوئی حملہ یا دھمکی نہیں ملی، امریکی شہریوں کے انخلا کے لیے ہر گھنٹے پرواز اڑانے کی کوشش ہے۔ترجمان پنٹگان جان کربی نے کہا کہ دوحہ میں طالبان رہنماؤں اور سربراہ امریکی سینٹرل کمانڈ کے درمیان ملاقات ہوئی، طالبان کے ساتھ دشمنی والے انداز میں کوئی بات چیت نہیں ہوئی۔
