کابل : 22 اکٹوبر ( ایجنسیز ) ہندو ستان نے افغانستان کے دارالحکومت کابل میں اپنا سفارتخانہ دوبارہ فعال کر دیا ہے۔ہند وستانی میڈیا کے مطابق یہ اقدام افغان وزیرِ خارجہ امیر خان متقی کے حالیہ دورہ ہندوستان کے بعد کیا گیا جس میں طے پایا تھا کہ ہندو ستان اپنے تکنیکی مشن کو سفارتخانہ کا درجہ دے گا۔رپورٹ کے مطابق ہندو ستان ۔کابل میں اپنے مشن کے سربراہ کو چارج ڈی افیرز مقرر کرے گا اور بعدازاں سفیر تعینات کرے گا جبکہ طالبان حکومت نومبر تک اپنے دو سفارت کار نئی دلی بھیجے گی جو افغان سفارتخانہ سے کام کریں گے۔ہندو ستان نے تاحال طالبان کی حکومت کو باضابطہ طور پر تسلیم نہیں کیا ہے۔ہندوستان نے اگست 2021ء میں طالبان کے کابل پر قبضہ کے بعد اپنا سفارتخانہ بند کر دیا تھا تاہم جون 2022ء میں سیکیورٹی یقین دہانیوں کے بعد کابل میں ایک تکنیکی مشن فعال کیا تھا۔
