ننگرہار ۔ 14 مئی (سیاست ڈاٹ کام) افغانستان کے دارالحکومت کابل کے میٹرنٹی اسپتال پر دہشت گرد حملے میں ایک ایسا بچہ بھی جاں بحق ہوا جو 7 سال کی دعاؤں کے بعد ماں کی گود میں آیا تھا۔27 سالہ زینب نے بتایا کہ اس نے اپنے بچے کے لیے 7 سال دعائیں کیں، منگل کی صبح وہ پیدا ہوا تو اس کا نام اْمید رکھا۔بچے کی پیدائش کے بعد وہ اپنے آبائی علاقے بامیان جانے کی تیاری کر رہے تھے کہ افراد پولیس اہل کاروں کے بھیس میں میٹرنٹی وارڈ میں داخل ہوئے اندھا دھند فائرنگ شروع کر دی۔فائرنگ سے بچہ امید جاں بحق ہو گیا جسے دْنیا میں آئے صرف چار گھنٹے ہوئے تھے۔کابل میں جس میٹرنٹی اسپتال پر حملہ کیا گیا اسے ڈاکٹروں کی رفاہی تنظیم ڈاکٹرز ودآویٹ بارڈرز چلاتی ہے۔واضح رہے کہ 2 روز قبل افغانستان میں دارالحکومت کابل میں زچہ بچہ اسپتال اور صوبہ ننگر ہار میں پولیس کمانڈر شیخ اکرم کی نمازِ جنازہ کے دوران ہونیوالے ہولناک حملوں میں عورتوں اور بچوں سمیت 40 افراد ہلاک جبکہ درجنوں زخمی ہوگئے تھے۔ہیومن رائٹس واچ نے ان حملوں کو جنگی جرم قرار دیا تھا، جبکہ داعش نے نمازِ جنازہ پر ہونے والے خودکش حملے کی ذمے داری قبول کی تھی۔
