شیو سینا کا ہنگامہ‘ ہوٹل میں توڑ پھوڑ،کئی کارکن گرفتار‘ کامرا کو دھمکیاں
ممبئی: اسٹینڈ اپ کامیڈین کنال کامرا نے اپنے ایک نئے شو کے دوران مہاراشٹرا کے نائب وزیر اعلیٰ ایکناتھ شنڈے پر طنز کے تیر برسائے جس سے تنازعہ کھڑا ہو گیا ہے۔ کامیڈین کے تبصرے پر شیوسینا کے کارکنوں نے اتوار کو ممبئی کے کھار علاقے میں اس ہوٹل میں توڑ پھوڑ کی جہاں ہیبی ٹیٹ کامیڈی کلب واقع ہے جس میں کنال نے یہ شو کیا تھا۔پولیس کے مطابق شیو سینا کے کارکنوں نے کھار علاقے میں ہوٹل یونی کانٹینینٹل میں توڑ پھوڑ کی جہاں اس شو کی شوٹنگ ہوئی تھی۔ شیو سینا کے کارکنوں نے شنڈے پر تبصرے کے لیے کامرا کے خلاف ایف آئی آر درج کرنے کا مطالبہ کیا۔پولیس اہلکار نے بتایا کہ شیو سینا کے سربراہ ایکناتھ شنڈے کے خلاف کامرا کا طنز والا ویڈیو سوشل میڈیا پر وائرل ہونے کے بعد پارٹی کارکنوں نے ہوٹل کے آڈیٹوریم میں گھس کر توڑ پھوڑ کی۔اس ویڈیو کو شیو سینا (یو بی ٹی) کے رہنما سنجے راوت نے بھی ٹوئٹر پر شیئر کیا اور لکھا کہ کنال کا کمال۔ کامرا نے اس شو میں فلم ‘دل تو پاگل ہے کے گانے بھولی سی صورت، آنکھوں میں مستی، دور کھڑی شرمائے کے ترمیم شدہ ورژن کے ساتھ شنڈے پر طنز کیا، جس سے سامعین میں ہنسی چھوٹ گئی۔شیوسینا کے رکن پارلیمنٹ نریش مہاسکے نے کنال کامرہ کو خبردار کیا کہ شیوسینا کے کارکنان ملک بھر میں ان کا پیچھا کریں گے۔ انہوں نے ایک ویڈیو پیغام میں کہا کہ آپ کو بھارت سے بھاگنے پر مجبور کر دیا جائے گا۔مہاسکے نے کنال کامرا کو کرائے کا کامیڈین قرار دیتے ہوئے کہا کہ انہیں سانپ کی دم پر قدم نہیں رکھنا چاہیے تھا۔ انہوں نے خبردار کیا کہ اس کے سنگین نتائج برآمد ہوں گے۔ تھانے کے ایم پی نے یہ بھی الزام لگایا کہ کامیڈین نے شیو سینا (یو بی ٹی) کے سربراہ ادھو ٹھاکرے سے پیسے لے کر شنڈے کو نشانہ بنا یا ہے۔ادھرادھو ٹھاکرے نے کنال کامراکی حمایت کی اور کہاکہ غدار کوغدار کہناغلط نہیںہے۔ رکن راجیہ سبھاسماج وادی پارٹی جیہ بچن نے اس کی حما یت کی اور کہا کہ کامراکے خلاف کارروائی اظہار خیال کی آزادی پر پابندی کے مترادف ہوگا ۔
