تلنگانہ میں قومی شاہراہوں کیلئے منصوبہ بندی اور بجٹ کی اجرائی کا مطالبہ
حیدرآباد ۔5۔ مارچ (سیاست نیوز) کانگریس رکن پارلیمنٹ کومٹ ریڈی وینکٹ ریڈی نے مرکزی وزیر روڈ ٹرانسپورٹ نتن گڈکری سے ملاقات کی اور قومی شاہراہ 30 کتہ گوڑم میں قومی شاہراہ کی توسیع کے لئے فنڈس کی اجرائی کی درخواست کی ۔ انہوں نے مرکزی وزیر کو یادداشت حوالے کی جس میں بتایا گیا ہے کہ محبوب آباد ۔ حیدرآباد تا کتہ گوڑم سڑک کو قومی شاہراہ کی حیثیت سے تسلیم کیا گیا ہے ۔ مذکورہ شاہراہ کا انتظام ٹھیک نہیں جس کے نتیجہ میں عوام کو دشواریوں کا سامنا ہے ۔ انہوں نے شکایت کی کہ مرمتی کاموں کی انجام دہی میں تاخیر سے حادثات پیش آرہے ہیں۔ وینکٹ ریڈی نے کہا کہ حیدرآباد ، وشاکھاپٹنم اور چھتیس گڑھ کے درمیان 100 کیلو میٹر کے فاصلہ میں کمی واقع ہوئی ہے ۔ بھونگیر پارلیمانی حلقہ میں قومی شاہراہ 100 کیلو میٹر پر محیط ہے ۔ 2016 ء میں تفصیلی پراجکٹ رپورٹ تیار کی گئی لیکن آج تک عمل آوری نہیں کی گئی۔ وینکٹ ریڈی نے بتایا کہ دور دراز کے قبائلی گاؤں ، بھدرا چلم دیوستھانم کے درمیان سڑک کی تعمیر پر فوری توجہ دی جائے ۔ نتن گڈکری نے اس سلسلہ میں مثبت کارروائی کا تیقن دیا۔ وینکٹ ریڈی نے بتایا کہ 2019 ء میں مرکز نے اس سڑک کو قومی شاہراہ کے طور پر تسلیم کیا تھا لیکن تعمیری کام کا آغاز نہیں ہوا۔ مرکزی وزیر سے درخواست کی گئی کہ متعلقہ عہدیداروں کو قومی شاہراہ کے نمبر الاٹ کرتے ہوئے پراجکٹ رپورٹ کی منظوری کی ہدایت دیں۔ اس کے علاوہ قومی شاہراہ کی تعمیر کیلئے درکار فنڈس کی اجرائی عمل میں لائی جائے۔
