مرکزی حکومت کی پالیسیوں کے خلاف عوامی بیداری کا فیصلہ ۔کانگریس ورکنگ کمیٹی کا اجلاس
نئی دہلی :کانگریس ورکنگ کمیٹی کے اہم اجلاس کے بعد یہ بات واضح ہوگئی ہے کہ اگلے سال 21 اگست اور 20 ستمبر کے درمیان کانگریس کے نئے صدر کا انتخابات ہو جائے گا۔ کانگریس قائد کے سی وینوگوپال نے انتخابات کا پورا شیڈول بتاتے ہوئے کہا کہ کانگریس صدر کا انتخاب آئندہ سال اگست اور ستمبر کے درمیان ہو جائے گا۔ انہوں نے کہا کہ سی ڈبلو سی کا مکمل اجلاس اگلے سال ستمبر یا اکتوبر میں ہونے کا امکان ہے۔کانگریس کے ترجمان رندیپ سنگھ سرجے والا نے کہا کہ سی ڈبلو سی اجلاس کے دوران کچھ ارکان نے راہول گاندھی سے کانگریس صدر کی ذمہ داری سنبھالنے کیلئے گزارش کی، جس پر راہول گاندھی نے ان کا شکریہ ادا کیا۔ کانگریس ورکنگ کمیٹی کے ارکان میں یہ اتفاق رائے تھا کہ راہول گاندھی کانگریس کے صدر بنیں۔کے سی وینوگوپال نے بتایا کہ کانگریس میں ارکان بنانے کی مہم یکم نومبر سے لے کر 31 مارچ 2022 تک چلائی جائے گی۔ انہوں نے بتایا کانگریس ملک گیر پیمانہ پر عوامی بیداری تحریک چلائے گی اور مرکزی حکومت کی پالیسیوں کے خلاف عوامی بیداری پیدا کرے گی۔رندیپ سنگھ سرجے والا نے کہا کہ جب تک کانگریس صدر منتخب نہیں ہوتے تب تک سونیا گاندھی ہی مکمل طور پر صدر کے فرائض انجام دیں گی اور وہ خراب صحت کے با وجود کانگریس کا کام کاج پوری طرح دیکھ رہی ہیں۔