بنگلورو: کرناٹک کانگریس نے بی جے پی کے قومی صدر جے پی نڈا اور پارٹی کے آئی ٹی سیل کے سربراہ امیت مالویہ کے خلاف پارٹی لیڈر راہول گاندھی اور دیگر کے خلاف توہین آمیز پوسٹ کرنے پر سٹی پولیس میں مقدمہ درج کرایا ہے ۔کانگریس نے چنڈی گڑھ بی جے پی کے صدر ارون سود کیخلاف گاندھی کا ایک اینیمیٹڈ ویڈیو جاری کرنے پر بھی شکایت درج کرائی ہے ، جس میں دعویٰ کیا گیا ہیکہ کانگریس ملک مخالف سرگرمیوں میں ملوث ہے ۔کرناٹک کے وزیر پریانک کھرگے اور کرناٹک پردیش کانگریس کمیٹی کے ترجمان رمیش بابو نے تعزیرات ہند (آئی پی سی) کی دفعہ 505(2) ، 553(اے )، 120(بی)، 34 کے تحت شکایت درج کرائی ہے۔ انہوں نے کہا کہ مالویہ نے 17جون کو اپنے آفیشل اکاؤنٹ سے ویڈیو پوسٹ کی تھی، جس میں دعویٰ کیا گیا تھا کہ گاندھی ہندوستان سے باہر اپنے دوروں پر ملک مخالف سرگرمیوں میں شامل ہوتے ہیں۔
کھڑگے نے کہا ‘‘ہم نے بی جے پی کے ذریعہ چلائی جارہی جھوٹ کی فیکٹری کو بند کرنے کا فیصلہ کیا ہے ۔ بی جے پی اس سے بچ گئی ہے کیونکہ یہاں ان کی حکومت تھی۔ اس کے بعد حقائق کی جانچ کرنے والا یونٹ بند کر دیا گیا۔ اب حقائق کی جانچ کرنے والے یونٹ کو مضبوط کیا جائے گا۔ میں (پریانک کھڑگے ) پہلے ہی وزیر اعلیٰ سے بات کر چکا ہوں۔ کھڑگے نے کہا کہ نڈا، مالویہ اور سود جیسے لوگوں کو ان کے اکاؤنٹ سے پھیلائے گئے ‘جھوٹ’ کو ثابت کرنا ہوگا۔
