نئی دہلی : پنجاب اسمبلی انتخابات سے پہلے سابق صدر جمہوریہ گیانی ذیل سنگھ کے پوتے سردار اندرجیت سنگھ نے آج بھارتیہ جنتا پارٹی (بی جے پی) میں شمولیت اختیار کرلی اور کانگریس پر الزام لگایا کہ ان کے دادا جان کی گاڑی کو جان بوجھ کر ایکسیڈنٹ کرواکر ان کا قتل کرایا گیا تھا۔ بی جے پی کے مرکزی دفتر میں پارٹی کے جنرل سکریٹری اور پنجاب کے انچارج ڈاکٹر دُشینت گوتم اور مرکزی وزیر ہردیپ سنگھ پوری نے اندرجیت سنگھ کو کھنڈوا پہنا کر خوش آمدید کہا اور رکنیت کی پرچی ان کے حوالے کی۔اس موقع پر اندرجیت سنگھ نے کہا کہ آج ان کے آنجہانی دادا کی خواہش کئی برسوں کے بعد پوری ہوئی ہے ۔ ان کی وفاداری کے باوجود کانگریس نے ان کے ساتھ جو سلوک کیا اس سے وہ دلبرداشتہ تھے ۔ انہوں نے کہا ‘‘میرے دادا چاہتے تھے کہ میں بی جے پی میں شامل ہو جاؤں۔ انہوں نے مجھے اٹل بہاری واجپائی اور ایل کے اڈوانی سے آشیرواد لینے کے لیے بھیجا تھا۔ اندرجیت سنگھ نے کانگریس قیادت پر سنسنی خیز الزام لگایا کہ 1994 میں ان کے دادا اور سابق صدر گیانی ذیل سنگھ کی گاڑی کسی سازش کی وجہ سے جان بوجھ کر حادثہ کا شکار ہو گئی تھی ، جس کے بعد علاج کے دوران ان کی موت ہو گئی۔
