سی پی آئی کا راونڈ ٹیبل اجلاس، بائیں بازو قائدین و جہد کاروں کی شرکت
حیدرآباد ۔ 20۔نومبر (سیاست نیوز) صدر پردیش کانگریس مہیش کمار گوڑ نے فرضی انکاؤنٹر کے خلاف سی پی آئی کی جانب سے مخدوم بھون میں منعقدہ راؤنڈ ٹیبل اجلاس میں شرکت کی ۔ حالیہ دنوں میں چھتیس گڑھ اور آندھراپردیش میں انکاؤنٹرس کے نام پر ماؤسٹ قائدین کی ہلاکت کے خلاف یہ اجلاس منعقد کیا گیا۔ اجلاس میں سی پی آئی کے ریاستی سکریٹری سامبا سیوا راؤ ، تلنگانہ جنا سمیتی کے سربراہ پروفیسر کودنڈا رام ، سابق رکن اسمبلی جے رنگا ریڈی ، پروفیسر ہرگوپال ، جہد کار وملا اکا ، چلپتی راؤ ، ای ٹی نرسمہا اور دیگر قائدین نے شرکت کی ۔ اس موقع پر خطاب کرتے ہوئے مہیش کمار گوڑ نے فرضی انکاؤنٹر کی مذمت کی ۔ انہوں نے کہا کہ ماؤسٹ قائدین ہڈما ، گنپتی اور دوسروں نے سماج میں انصاف کے لئے جدوجہد کی تھی۔ ماؤسٹ قائدین نے غریبوں کے حقوق کے لئے ہمیشہ جدوجہد کی۔ مرکز نے بی جے پی کے برسر اقتدار آنے کے بعد سے فرضی انکاؤنٹرس میں اضافہ ہوچکا ہے ۔ مہیش کمار گوڑ نے کہا کہ وہ خود بھی ماؤسٹوں کا نشانہ بن چکے ہیں۔ کانگریس پارٹی تشدد کی حوصلہ افزائی نہیں کرے گی۔ مرکزی حکومت کی جانب سے آپریشن کگار کے نام پر ماؤسٹوں کا صفایہ کیا جارہا ہے ۔ ماؤسٹوں کی جانب سے مذاکرات کی پیشکش کے باوجود مرکز نے کارروائیوں کا سلسلہ جاری رکھا۔ مہیش کمار گوڑ نے فرضی انکاؤنٹرس کی غیر جانبدارانہ تحقیقات کا مطالبہ کیا ۔ انہوں نے کہا کہ بی جے پی کی پالیسیوں کو روکنے کیلئے تمام جمہوری طاقتوں کو متحدہ ہونے کی ضرورت ہے۔ سی پی آئی کے ریاستی سکریٹری ڈاکٹر نارائنا نے حالیہ انکاونٹرس کو فرضی قرار دیا اور کہا کہ چھتیس گڑھ اور آندھراپردیش میں ماؤسٹ قائدین کو نشانہ بناتے ہوئے انکاؤنٹر کا نام دیا جارہا ہے ۔1
