برقی سربراہی کے مسئلہ پر کانگریس کے الزامات مسترد
حیدرآباد۔/16 جولائی، ( سیاست نیوز) وزیر فینانس ہریش راؤ نے کہا کہ تلنگانہ میں کانگریس پارٹی کا حال ایک دیوانے کے ہاتھ میں پتھر کے مترادف ہے۔ ہریش راؤ آج تلنگانہ بھون میں ظہیرآباد اسمبلی حلقہ سے تعلق رکھنے والے کانگریس قائدین کی بی آر ایس میں شمولیت کے موقع پر خطاب کررہے تھے۔ سابق ٹیچرس اور دیگر طبقات سے تعلق رکھنے والوں کی بی آر ایس میں شمولیت سے ظہیرآباد اسمبلی حلقہ میں پارٹی کا موقف مستحکم ہوسکتا ہے۔ ہریش راؤ نے خطاب کرتے ہوئے کانگریس کی موجودہ صورتحال پر افسوس کا اظہار کیا اور کہا کہ پردیش کانگریس کی صدارت پر فائز شخص دراصل چندرا بابو نائیڈو کے حقیقی وارث ہیں۔ نائیڈو کی طرح ریونت ریڈی بھی کسانوں کی بھلائی کے مخالف ہیں۔ زرعی شعبہ کو صرف تین گھنٹے برقی سربراہی سے متعلق ریونت ریڈی کے بیان پر ہریش راؤ نے کہا کہ کانگریس دور حکومت میں برقی بحران تھا جس کے نتیجہ میں کسان پریشان تھے۔ انہوں نے عوام سے اپیل کی کہ کانگریس دور حکومت اور بی آر ایس دور حکومت میں برقی سربراہی کا موازنہ کریں۔ کے سی آر نے انتہائی کم عرصہ میں برقی بحران پر قابو پالیا ہے۔ انہوں نے کہا کہ پونالہ لکشمیا جس وقت وزیر برقی تھے برقی کی عدم سربراہی کے نتیجہ میں سات تا آٹھ کانگریس کے ارکان اسمبلی کو شکست کا سامنا کرنا پڑا تھا۔ انہوں نے کہا کہ اپوزیشن جماعتوں کو برقی سربراہی کے بارے میں حکومت پر تنقید کا کوئی حق نہیں ہے۔ ہریش راؤ نے کالیشورم اور دیگر پراجکٹس کی تعمیر کے ذریعہ کسانوں کی زندگی میں خوشحالی لانے کیلئے کے سی آر کی ستائش کی۔ر