نئی دہلی : کانگریس کے قدآو ر لیڈر، سابق مرکزی وزیر اور مدھیہ پردیش کے سابق وزیراعلی موتی لال وورا کا پیر کو 93 برس کی عمر میں انتقال ہوگیا۔دو بار مدھیہ پردیش کے وزیراعلی رہ چکے موتی لال وورا نے دہلی کے فورٹس اسپتال میں آخری سانس لی۔ وہ 2000 سے 2018تک پارٹی کے خزانچی رہے ۔ وورا کا کل 20دسمبر کو 93واں یوم پیدائش تھا۔ صحت خراب ہونے کی وجہ سے وورا کو اسپتال میں داخل کرایا گیا تھا۔ وہ اترپردیش کے گورنر بھی رہے تھے اورراجیہ سبھا کے رکن بھی۔وزیراعظم نریندر مودی نے وورا کے انتفال پر گہرے دکھ کا اظہار کرتے ہوئے انہیں تجربہ کار ایڈمنسٹریٹراور آرگنائزر قرار دیا۔ پارٹی کے سابق صدر راہول گاندھی نے وورا کے انتقال پر گہرے رنج و غم کا اظہار کیاہے ۔ راہول گاندھی نے کہاکہ وورا سچے کانگریسی اور بہترین انسان تھے ۔ انکی کمی ہمیشہ محسوس ہوگی۔ انہوں نے ان کے کنبہ کے ساتھ تعزیت کا اظہار کیا۔ راہول نے ایک ٹوئٹ میں کہا کہ وورا جی ایک سچے کانگریسی اور بہترین انسان تھے ۔ انکی کمی ہمیشہ محسوس ہوگی۔ ان کے کنبہ اور دوستوں سے میری تعزیت۔ وزیر دفاع راجناتھ سنگھ نے بھی مسٹر وورا کے انتقال پر دکھ کا اظہار کیا ہے ۔
