بوکاوو ، 22 اپریل ( سیاست ڈاٹ کام ) مشرق افریقی ملک کانگو کے صوبہ جنوبی کیوو کے اویرا شہر میں موسلادھار بارش کی وجہ سے ہلاک شدگان کی تعداد بڑھ کر 48 ہو گئی ۔ صوبائی افسر نے منگل کے روز بتایا کہ راحتی عملے نے اب تک 48 لاشیں برآمد کی ہیں ۔انہوں نے بتایا کہ جمعہ کے روز ہوئی شدید بارش سے تقریبا 5000 ڈھانچے کو بھی نقصان پہنچا ہے ۔کیوو کی صوبائی حکومت کے حکام کے مطابق اویرا شہر میں اقوام متحدہ کے مشن کی مدد سے انسانی امداد فراہم کی جا رہی ہے ۔ کنشاسا میں منگل کو منعقد سکیورٹی میٹنگ کے دوران صدر فیلکس تشسکیدی نے متاثرہ افراد کی ہنگامی انسانی امداد کے لئے صوبائی ٹیم کے تعاون کیلئے ایک مضبوط سرکاری ٹیم کو چہارشنبہ کو مشرقی شہر بوکاوو بھیجنے کا فیصلہ کیا ۔
