برلن /17 فروری ( سیاست ڈاٹ کام ) جرمنی میں جاری سالانہ میونخ سیکورٹی کانفرنس میں اعلیٰ چینی نمایندے یانگ جی ایچی نے کہا ہے کہ بیجنگ حکومت بین الاقوامی سطح پر تعاون کے لیے کثیر فریقی نظام کی بھرپور حمایت کرتا ہے۔ کانفرنس سے خطاب کرتے ہوئے جی ایچی نے کہا کہ دنیا ایک ایسے دوراہے پر کھڑی ہے، جہاں اسے انفرادی اور کثیرفریقی نظاموں میں سے کسی ایک کا انتخاب کرنا ہے۔ میونخ سیکورٹی کانفرنس میں رواں سال بھی دنیا بھر سے سیاسی اور سفارتی شعبوں کی سیکڑوں انتہائی اہم شخصیات حصہ لے رہی ہیں۔
امید ہے امریکہ اور روس آئی این ایف معاہدے میں لوٹیں گے : چین
بیجنگ، 17 فروری (سیاست ڈاٹ کام ) چین نے امید ظاہر کی ہے کہ امریکہ اور روس درمیانہ فاصلے کے جوہری طاقت (آئی این ایف) معاہدے میں واپس لوٹیں گے ۔کمیونسٹ پارٹی آف چائنا (سی پی سی ) سینٹرل کمیٹی کے سیاسی بیورو کے رکن اور سی پی سی سینٹرل کمیٹی کے خارجہ امور کمیشن کے ڈائرکٹر یانگ جے چي نے 55 ویں میونک سیکورٹی کانفرنس میں تقریر کرنے کے بعد ہفتہ کو یہ باتیں کہیں۔انہوں نے کہا کہ چین عالمی اسٹریٹجک استحکام برقرار رکھنے کا حامی ہے ۔انہوں نے کہا کہ امریکہ کا اس معاہدہ سے ہٹنے کا یکطرفہ فیصلہ ایک سنگین معاملہ ہے اور اس نے بین الاقوامی برادری کو تشویش میں ڈال دیا ہے ۔