بی جے پی کا دعویٰ
نئی دہلی : بی جے پی نے دہلی کے وزیر اعلی اروند کجریوال پرجھوٹ بولنے کا الزام عائد کرتے ہوئے کہا ہے کہ ان کے جھوٹ کی وجہ سے 12 ریاستوں میں آکسیجن کی سپلائی متاثر ہوئی ہے ، اگر ان ریاستوں کو آکسیجن مل جاتا توکئی لوگوں کی جان بچائی جاسکتی تھی۔بی جے پی کے ترجمان سمبیت پاترا نے جمعہ کے روز یہاں پریس کانفرنس میں کہا کہ مسٹر کجریوال نے آکسیجن کے تعلق سے گھناؤنی سیاست کر کے گھناؤنا جرم کیا ہے ، اس مجرمانہ غفلت کے لئے انہیں سپریم کورٹ میں قصوروار ٹھہرایا جانا چاہئے ۔انہوں نے آکسیجن رپورٹ کا حوالہ دیتے ہوئے کہا کہ کجریوال حکومت نے سپریم کورٹ میں کہا تھا کہ انہوں نے انڈین کونسل آف میڈیکل ریسرچ کے رہنما خطوط کے مطابق آکسیجن کی ضرورت کی حساب لگایا تھا ، لیکن جب عدالت عظمی کی جانب سے تشکیل کردہ کمیٹی نے کجریوال سے آئی سی ایم آر کے رہنما خطوط کی کاپی مانگی تو انہوں نے ہاتھ کھڑے کر دیے ۔ کجریوال نے سپریم کورٹ میں جھوٹ بولا جس کے لئے انہیں معافی مانگنی چاہئے ’’۔پاترا نے مزید کہا ‘‘ 6 مئی کو کجریوال نے ایک پریس کانفرنس کرکے 700 میٹرک ٹن آکسیجن کا مطالبہ کیا تھا۔ اس کے کچھ گھنٹوں بعد پارٹی نے کہا تھا کہ 976میٹرک ٹن آکسیجن کی ضرورت ہے ۔ ایک ہی دن میں علحدہ اعداد وشمار بتائے گئے۔ یہ کہیں نہ کہیں سازش کے تحت کیا گیا ۔ دہلی حکومت نے اپنی غلطی چھپانے کیلئے مرکز پر الزام لگا یا ۔ انہوں نے کہا آکسیجن آڈٹ کیلئے تشکیل دی گئی کمیٹی نے کہا کہ دہلی حکومت کی طرف سے 25 اپریل سے 10 مئی کے درمیان دہلی میں آکسیجن کی جومانگ رکھی گئی ، وہ دراصل ضرورت سے چار گنا زیادہ تھی۔