مسلم برادری کی حمایت ہمارا فرض ہے : جسنڈاآرڈرن
کرائسٹ چرچ : نیوزی لینڈ کی وزیر اعظم جسنڈا آرڈرن نے کرائسٹ چرچ مساجد میں حملوں کے دو سال مکمل ہونے پر منعقدہ یادگارتقریب میں کہا ہے کہ ملک کا یہ فرض ہے کہ وہ مسلم برادری کی حمایت کرے۔15 مارچ 2019 ء کو بھاری ہتھیاروں سے لیس مسلح شخص کی جانب سے کرائسٹ چرچ کی دو مساجد میں اندھا دھند فائرنگ کے نتیجے میں 51 افراد جاں بحق اور درجنوں زخمی ہوگئے تھے۔سخت سیکیورٹی میں منعقد ہ تقریب میں سیکڑوں افراد نے شرکت کی۔تقریب میں جاں بحق ہونے والے تمام افراد کے نام پکارے گئے جبکہ حملے کے بعد فوری مدد کیلئے پہنچنے والے پولیس اور طبی عملے کی کاوشوں کو بھی سراہا گیا۔ تیمل اتاکوگو چہرے، ہاتھ اور پاؤں میں 9 گولیاں ماری گئی تھیں، انہوں نے آبدیدہ ہو کر ان لمحات کو یاد کیا جب وہ تین سال کے موکاد ابراہیم کے والد کے ہمراہ طبی مدد کا انتظار کر رہے تھے اور انہیں پتہ چلا کہ بچہ جاں بحق ہو چکا ہے۔ انہوں نے کہا کہ ‘اس وقت مجھے اپنی تکلیف معمولی لگنے لگی۔ نیوزی لینڈ کی وزیر اعظم جسنڈا آرڈرن جنہوں نے حملے میں زندہ بچ جانے والوں اور فائرنگ سے متاثرہ خاندانوں کے ساتھ ہمدردی کی جس کی بڑے پیمانے پر تعریف ہوئی اور جنہوں نے ملک میں آتشیں اسلحہ کنٹرول کو مزید سخت کرنے کیلئے فوری اقدامات اٹھائے۔ انہوں نے کہا کہ کوئی بھی الفاظ ان زخموں کو بھر نہیں سکتے۔ان نے کہا کہ دہشت گردی کے اس واقعے میں مرد، خواتین اور بچوں کو ہم سے چھین لیا گیا، الفاظ اس خوف کو ختم نہیں کر سکتے جو مسلم برادری کے دل میں بیٹھ گیا ہے۔ جسنڈا آرڈرن نے کہا کہ ہمیں اس واقعے سے خود کو ایک متحد قوم بنانا چاہیے۔