بیجنگ۔ 22 جولائی (ایجنسیز) چین کے دارالحکومت بیجنگ میں ایک شخص نے مہنگے کرایے سے بچنے کے لیے انوکھا راستہ اختیار کیا ہے۔ تیانجن شہر سے تعلق رکھنے والے 38 سالہ یان نے گزشتہ تین برسوں سے اپنی بڑی الیکٹرک گاڑی کو ہی اپنا عارضی گھر بنا رکھا ہے۔یان ہر پیر کو صبح 5:30بجے تیانجن سے بیجنگ کیلئے روانہ ہوتا ہے جو تقریباً 130 کلومیٹر کا سفر ہے اور جمعہ کی شام کام سے فارغ ہو کر واپس اپنے گھر چلا جاتا ہے جہاں اس کی اہلیہ اور دو بیٹے مقیم ہیں۔اس منفرد طرزِ زندگی کی شروعات 2022 میں ہوئی، جب یان نے کرائے کی بلند قیمتوں سے تنگ آکر 2500 یوآن ماہانہ کرایے والا فلیٹ چھوڑ دیا اور ایک بڑی الیکٹرک گاڑی خرید لی۔اب وہ پیر سے جمعرات تک اپنی گاڑی میں سوتا ہے، اکثر کسی پارک کے قریب گاڑی کھڑی کرتا ہے، اور پارک میں چہل قدمی کے بعد گاڑی کے اندر ہی ناشتہ تیار کرتا ہے۔یان کا کہنا ہیکہ جب آپ کی گاڑی میں جگہ موجود ہو اور چارجنگ اسٹیشن دستیاب ہوں تو اس میں رہنا بالکل برا نہیں ہوتا۔ وہ رات کو ٹی وی دیکھتا ہے، گانے گاتا ہے، گھر والوں سے ویڈیو کال کرتا ہے اور کمپیوٹر پروگرامنگ میں بھی وقت صرف کرتا ہے۔عموماً وہ رات 10 یا 11 بجے سو جاتا ہے۔
