کراچی، 21 اگست (یو این آئی) کراچی میں بارش کے بعد بجلی کا بحران شدت اختیار کرگیا، کئی علاقے 2 روز بعد بھی بجلی سے محروم ہیں۔میڈیا کے مطابق منگل کو بارش کے بعد سے کراچی میں بجلی کا بریک ڈاؤن جاری ہے ، کئی علاقے دو دن گذرنے کے بعد بھی بجلی سے محروم ہیں۔نارتھ ناظم آباد بلاک اے ، گلستان جوہر بلاک 9، نانک واڑہ، یوسف گوٹھ اور رام سوامی میں تاحال بجلی بند ہے ۔ملیر سعود آباد، خداکی بستی، ابراہیم حیدری، شنانتی نگر، اسٹیڈیم روڈ، کیماڑی اور اعظم بستی بھی بجلی غائب ہے ، بجلی کی طویل عدم سربراہی کے باعث شہریوں کی زندگیاں اجیرن ہوگئیں۔ کل کے الیکٹرک حکام نے شہر کے 94 فیصد سے زائد علاقوں کو بجلی کی فراہمی بحال کرنے کا دعویٰ کیا تھا۔کے الیکٹرک کے چیف ایگزیکٹو مونس علوی نے کہا تھا کہ منگل کی شام 6 بجے تک شہر کے 94 فیصد سے زائد علاقوں کو بجلی کی فراہمی بحال کر دی ہے ۔انہوں نے کہا تھا کہ شہر میں 130 سے 170 ملی لیٹر تک بارش رپورٹ ہوئی۔
