کراچی۔ 19 دسمبر (سیاست ڈاٹ کام ) سری لنکا کے خلاف یہاں شروع ہوئے دوسرے ٹسٹ میں پاکستانی بیٹنگ ناکام ہوگئی اور پہلی اننگز میں مکمل طور پر ناکام ہونے کے بعد پوری ٹیم صرف 191 رنز پر ہی ڈھیر ہوگئی۔ کراچی میں 10 سال بعد ٹسٹ کرکٹ کی رونقیں دوبارہ لوٹ آئی اور آج پہلا میچ سری لنکا اور پاکستان کے درمیان نیشنل اسٹیڈیم کراچی میں کھیلا جارہا ہے۔ میزبان ٹیم نے دوسرے ٹسٹ میں سری لنکا کے خلاف ٹاس جیت کر پہلے بیٹنگ کا فیصلہ کیا۔پاکستان کی جانب سے اننگز کا آغاز شان مسعود اور عابد علی نے کیا تاہم اوپنرز ایک بار پھر خاص کارکردگی کا مظاہرہ نہ کرسکے اور 10 کے مجموعی اسکور پر شان مسعود 5 رنز بناکر پویلین لوٹ گئے جب کہ کپتان اظہر علی صفر پر ہی آؤٹ ہوگئے، اوپنر عابد علی نے 38 رنز بنائے اور کمارا کی گیند پر ایل بی ڈبلیو ہوئے۔بابر اعظم اور اسد شفیق نے چوتھی وکٹ کی شراکت میں 62 رنز جوڑے۔ 127 کے اسکور پر بابر اعظم غیر ضروری طور پر اسٹمپ ہوئے۔ انہوں نے 60 رنز بنائے۔اسد شفیق کریزکی ایک جانب موجود رہے تو دوسری جانب پاکستان کو یکے بعد دیگرے حارث سہیل ، محمد رضوان اور یاسر شاہ کی صورت میں 3 نقصانات برداشت کرنا پڑے۔ 172 رنز کے مجموعی اسکور پر پاکستان کی 7 وکٹیں گر چکی تھیں، ایسے موقع پر محمد عباس 179 رنز پر آؤٹ ہوئے، 185 رنز پر اسد شفیق بھی پویلین لوٹے اور 191 رنز پر پوری ٹیم ہی پویلین لوٹ گئی۔ پاکستان کے 191 رنز کے جواب میں پہلے دن کے اختتام پر سری لنکا نے تین وکٹوں کے نقصان پر 64 رنز بنائے ہیں۔
