بنگلورو:حکومت سازی کے فوراً بعد سے ہی کرناٹک کی کانگریس حکومت نے عوام کے حق میں پالیسیاں بنانے کی شروعات کر دی ہے۔ پہلی کابینہ میٹنگ میں حسب وعدہ 5 گارنٹی کو منظوری دی گئی، اور اب ریاست میں ’اندرا کینٹین‘ کی بحالی ہوئی ہے۔ چیف منسٹرٰ سدارمیا نے کہا کہ وہ پھر سے اندرا کینٹین شروع کریں گے تاکہ بڑھتی مہنگائی میں لوگوں کو سستی شرح پر کھانا دستیاب ہو سکے۔ وزیر اعلیٰ نے کہا ہے کہ ایک ماہ کے اندر اندرا کینٹین شروع کیا جائے گا۔ اس کینٹین سے 5 روپے میں ناشتہ اور 10 روپے میں بھر پیٹ کھانا مل سکے گا۔قابل ذکر ہے کہ اندرا کینٹین کی شروعات پچھلی کانگریس حکومت نے کی تھی۔ جب بی جے پی برسراقتدار آئی تو اس نے اندرا کینٹین کو بند کر دیا تھا۔ ملک میں مہنگائی بڑھ رہی ہے ایسے میں راہول گاندھی جب کرناٹک دورے پر گئے تھے تو انھوں نے کچھ فوڈ ڈیلیوری کرنے والوں سے ملاقات کی تھی۔ انھوں نے راہول گاندھی سے کینٹین کو دوبارہ شروع کرنے کی گزارش کی تھی۔ اس گزارش کو دیکھتے ہوئے انتخابی تشہیر کے دوران راہول گاندھی نے وعدہ کیا تھا کہ کانگریس حکومت بننے پر اندرا کینٹین کو دوبارہ شروع کیا جائے گا۔ اب اسی وعدے کو پورا کرنے کا راستہ ہموار ہو گیا ہے۔میڈیا رپورٹس کے مطابق بنگلورو نگر پالیکا نے بریک فاسٹ، لنچ اور ڈنر کے لیے مینیو تیار کر لیا ہے۔ اندرا کینٹین میں روزانہ الگ الگ طرح کے پکوان بنیں گے۔ ناشتہ میں اْپما، کیسری باتھ، بیسی بیلے باتھ، پونگل اور اڈنی و دیگر پکوان شامل ہوں گے۔ بتایا جاتا ہے کہ اس کے لیے ٹینڈرنگ کا عمل شروع ہو گیا ہے۔ قابل ذکر یہ بھی ہے کہ 175 میں سے 163 کینٹین تو پہلے ہی سے چل رہی ہیں۔
