مولانا صغیر احمد رشادی کو تیقن، تمام مذاہب کا یکساں طور پر احترام کیا جائیگا
حیدرآباد۔/12 جولائی، ( سیاست نیوز) چیف منسٹر کرناٹک سدا رامیا نے مسلم مذہبی رہنماؤں کو یقین دلایا کہ کرناٹک میں یکساں سیول کوڈ کے نفاذ کی ہرگز اجازت نہیں دی جائے گی اور کانگریس پارٹی یکساں سیول کوڈکے نفاذ کی سختی سے مخالفت کرتے ہوئے مسترد کرچکی ہے۔ سدا رامیا نے کرناٹک کے امیر شریعت مولانا صغیر احمد رشادی اور دیگر علمائے کرام سے ملاقات کے موقع پر یکساں سیول کوڈ کے سلسلہ میں مسلمانوں میں پائی جانے والی بے چینی سے خود کو ہم آہنگ کیا۔ انہوں نے کہا کہ کرناٹک میں تمام مذاہب اور ان کے ماننے والوں کا یکساں طور پر احترام کیا جائے گا اور کسی بھی مذہب کے جذبات مجروح کرنے کی اجازت نہیں رہے گی۔ دستور کی دفعہ 25 کے تحت ہر شہری کو اپنی پسند کا مذہب اختیار کرنے کی اجازت دی گئی ہے۔ کسی بھی شہری پر کسی اور مذہب کی تعلیمات کو مسلط نہیں کیا جاسکتا۔ کرناٹک حکومت دستور کی پابند ہے اور یکساں سیول کوڈ کے نفاذ کی کوششوں کی مخالفت کی جائے گی۔ چیف منسٹر نے کرناٹک کے مسلمانوں کو تیقن دیا کہ ان کی حکومت یکساں سیول کوڈ پر عوام کے موقف سے حکومت ہند کو آگاہ کردے گی اور کرناٹک میں نفاذ کی اجازت نہیں دی جائے گی۔ مسلم پرسنل لاء بورڈ کی جانب سے چیف منسٹر کو ایک یادداشت پیش کی گئی۔ جامع مسجد بنگلور کے امام و خطیب مولانا محمد مقصود عمران رشادی نے بتایا کہ چیف منسٹر نے یکساں سیول کوڈ کے بارے میں اپنا موقف واضح کیا ہے۔ انہوں نے کہا کہ لاء کمیشن کو یکساں سیول کوڈ کے بارے میں رائے داخل کرنے کیلئے 14 جولائی آخری تاریخ ہے لہذا مسلمانوں کو زیادہ سے زیادہ تعداد میں اپنی رائے پیش کرنی چاہیئے۔ انہوں نے کہاکہ حکومت کی سطح پر یکساں سیول کوڈ کے خلاف موقف اختیار کرنا قابل ستائش ہے۔ ان کے مطابق مولانا صغیر احمد رشادی نے چیف منسٹر کو کرناٹک کے مسلمانوں کے مسائل سے واقف کرایا۔ر
