حلف برداری کے بعد دہلی کا پہلا دورہ، راجناتھ سنگھ سمیت دیگر وزراء سے بھی ملاقات پروگرام میں شامل
نئی دہلی : کرناٹک کے نئے وزیر اعلیٰ بسواراج بومئی آج نئی دہلی میں وزیراعظم نریندر مودی سے ملاقات کریں گے۔ کرناٹک کے وزیر اعلیٰ کے عہدہ کا حلف لینے کے بعد موصوف کا دہلی کا یہ پہلا دورہ ہے۔ شام 4 بجے وزیراعظم سے ملاقات سے قبل موصوف متعدد مرکزی وزراء بشمول وزیرداخلہ امیت شاہ، وزیر دفاع راج ناتھ سنگھ اور صدر بی جے پی جے پی نڈا سے بھی ملاقات کریں گے جہاں یہ سمجھا جارہا ہے کہ کرناٹک کی کابینہ میں توسیع کرنے کا موضوع زیربحث آئے گا۔ اس موقع پر میڈیا نمائندوں سے بات کرتے ہوئے انھوں نے کہاکہ وہ دہلی صرف اس لئے آئے ہیں کہ وزیراعظم نریندر مودی، دیگر مرکزی وزراء اور بی جے پی کے صدر سے ملاقات کرتے ہوئے اُن سب کا شکریہ ادا کرسکیں اور ان کی نیک خواہشات اور دعائیں حاصل کرسکیں۔ اسی دوران وزیر دفاع راج ناتھ سنگھ نے بھی ایک ٹوئٹ کرتے ہوئے بومئی سے ملاقات کا تذکرہ کیا اور کہاکہ اُن کی دعا ہے کہ مسٹر بومئی کامیابی کے ساتھ اپنی میعاد پوری کریں۔ جب اُن سے یہ پوچھا گیا کہ کیا کرناٹک کی کابینہ میں توسیع کا موضوع بھی زیربحث آئے تو اُنھوں نے کہاکہ بی جے پی ایک قومی جماعت ہے لہذا اُس سے یہ توقعات رکھی جاسکتی ہیں۔ اُنھوں نے کہاکہ مسٹر نڈا سے ملاقات کے بعد کرناٹک میں کابینہ کی توسیع کی سمت معین کی جائے گی۔ ہماری پارٹی کو درکار طاقت حاصل ہے اور نڈا سے ملاقات کے بعد ہی کوئی قطعی فیصلہ کیا جائے گا۔ یاد رہے کہ جمعرات کے روز مسٹر بومئی نے کرناٹک میں میڈیا نمائندوں سے بات کرتے ہوئے کہا تھا کہ وہ مرکزی قیادت سے کرناٹک کی کابینہ میں توسیع سے متعلق بات چیت کریں گے۔ دریں اثناء مسٹر بومئی نے جل شکتی وزیر گجندر سنگھ شیخاوت سے بھی ملاقات کرتے ہوئے اُن کے ساتھ دریائے کاویری پر میکے داتو آبپاشی پراجکٹ سے متعلق بات چیت کی۔ جمعہ کے روز کرناٹک سے تعلق رکھنے والے ایم پینر کیلئے مسٹر بومئی ایک ظہرانہ کا بھی اہتمام کریں گے۔ یہاں اس بات کا تذکرہ ضروری ہے کہ 28 جولائی کو کرناٹک کے سابق وزیر اعلیٰ بی ایس یدی یورپا کے سبکدوش ہونے کے بعد بسواراج بومئی نے کرناٹک کے نئے وزیر اعلیٰ کی حیثیت سے حلف لیا تھا۔