کولکاتا: کلکتہ ہائی کورٹ نے کلکتہ پولس کو ہدایت دی ہے کہ وہ کرکٹر محمد سمیع کی اہلیہ حسین جہاں کو سیکیورٹی فراہم کرے ۔حسین جہاں اور محمد سمیع کے درمیان تنازع چل رہا ہے اور جہاں نے الزام لگایا ہے کہ سوشل میڈیا پر اس کے کچھ پوسٹوں کے سلسلے میں کچھ لوگ اسے دھمکیاں دے رہے ہیں۔ جہاں کے وکیل آشیش چکرورتی نے بتایا کہ انہیں سوشل میڈیا پر اپنی کچھ پوسٹوں کے لئے دھمکیاں مل رہی ہیں اور اس سلسلے میں پولیس میں شکایت درج کروائی ہے ۔ چکرورتی نے عدالت کو بتایا کہ پولیس نے ان کی شکایت پر کوئی کارروائی نہیں کی ہے ۔ریاست کے سینئر ایڈوکیٹ امیشش بنرجی نے عدالت میں کہا کہ پولیس نے یہ شکایت ایک ایف آئی آر کے طور پر درج کی ہے اور اس کی تفتیش کی جارہی ہے ۔ جسٹس دیبانگو بساک نے دونوں فریقین کی سماعت کے بعد حکم دیا کہ پولیس اس بات کو یقینی بنائے کہ درخواست گزار کی جان و مال کو کوئی نقصان نہ ہو۔ پولیس کو جہان کی شکایت پر اٹھائے گئے اقدامات کے بارے میں بھی رپورٹ پیش کرنے کی ہدایت کی گئی تھی۔ عدالت نے چار ہفتوں میں رپورٹ پیش کرنے کی ہدایت کی ہے ۔خیال رہے کہ محمد سمیع اور حسین جہاں کے درمیان عدالت میں معاملات چل رہے ہیں۔جہاں نے کئی سنگین الزامات عائد کیے ہیں جس کی کلکتہ پولس جانچ کرے گی ۔
