سڈنی۔5؍جنوری ( ایجنسیز )کرکٹ آسٹریلیا کے سی ای او ٹوڈ گرین برگ انٹرنیشنل کرکٹ کونسل (آئی سی سی) قوانین پر برس پڑے۔ انہوں نے آئی سی سی کے خراب روشنی کے قانون کو تبدیل کرنے کا مطالبہ کر دیا۔ٹوڈ گرین برگ نے کہا کہ میرے خیال سے سڈنی ٹسٹ کے پہلے روز زیادہ کرکٹ ہونی چاہیے تھی۔ ہم تفریح کے کاروبار میں ہیں۔ میں کسی ایسے کاروبار کے بارے میں نہیں سوچ سکتا جو اپنے شائقین کے سامنے بار بار میدان چھوڑ دے۔انہوں نے کہا کہ کھلاڑیوں کی حفاظت سب سے اہم ہے۔ ہمارے پاس بلند وبالا لائٹ ٹاور اور جدید ٹیکنالوجی ہے اور مجھے یقین ہے کہ اس مسئلے کا کوئی نہ کوئی حل نکالا جا سکتا ہے تاکہ کھلاڑی خراب روشنی کے دوران گراؤنڈ سے باہر نہ آئیں۔واضح رہے کہ ایشیز سیریز کے سڈنی ٹسٹ کے پہلے روز کا کھیل خراب روشنی کی وجہ سے جلدی ختم کر دیا گیا تھا۔