بھیلواڑا۔ 31 جنوری (یواین آئی) راجستھان کے بھیلواڑا کے بھیم گنج تھانہ علاقے میں پولیس نے کرکٹ میچ پر آن لائن سٹہ لگواتے ہوئے چھ ملزمان کو گرفتار کیا ہے ۔ پولیس نے ہفتہ کو یہ اطلاع دی۔ انہوں نے بتایا کہ سٹہ بازوں کے اڈے پر کارروائی کرتے ہوئے موقع سے 49 اینڈرائیڈ موبائل، تین لیپ ٹاپ، دو ٹیبلٹ، سٹے میں استعمال ہونے والے دیگر آلات اور کروڑوں روپے کے لین دین کا حساب برآمد کیا گیا ہے ۔ پولیس نے بتایا کہ اطلاع ملنے پر جمعہ کی رات ایک مکان پر چھاپہ مارا گیا، جہاں تین کمروں میں بڑے پیمانے پر آن لائن سٹہ چلایا جا رہا تھا۔ کمروں میں رکھی بڑی میزوں پر لیپ ٹاپ اور بجلی سے جڑے کئی موبائل چل رہے تھے ، جن پر ملزمان مسلسل سٹے کے ریٹ بتا رہے تھے اور داؤ لگوا رہے تھے ۔ پولیس کو دیکھ کر ملزمان نے بھاگنے کی کوشش کی لیکن پولیس نے گھیرابندی کرکے سب کو گرفتار کر لیا۔ پولیس ذرائع نے بتایا کہ پوچھ گچھ میں سامنے آیا کہ ملزمان آسٹریلیا-پاکستان کرکٹ میچ پر آن لائن سٹہ بازی کر رہے تھے ۔ الیکٹرانک مواصلاتی ذرائع کا غلط استعمال کرکے عام لوگوں کو سٹے کے ریٹ بتا کر داؤ لگوایا جا رہا تھا۔
