لاہور، 16 اگست (ایجنسیز) ہندوستان کی اداکارہ کریتی سینن اور پاکستان کی اداکارہ و ماڈل ہانیہ 2025-26 کیلئے دنیا کی 10 خوبصورت ترین اداکاراؤں کی فہرست میں شامل ہوگئی ہیں۔ دنیا بھر میں بے حد کم وقت میں شہرت پانے والی دونوں اداکاراؤں نے خوبصورتی میں ہالی ووڈ اسٹارز امبر ہرڈ اور ایما واٹسن کو بھی پیچھے چھوڑ دیا ہے۔ فلموں، ڈراموں اور ویب سیریز کو ریٹنگ دینے اور شوبز شخصیات کی رینکنگ پیش کرنے والی ویب سائٹ ’انٹرنیٹ مووی ڈیٹا بیس‘ (آئی ایم بی ڈی) کی جانب سے جاری کی گئی فہرست میں دنیا کی خوبصورت ترین اداکاراؤں میں 35 سالہ کریتی کو پانچواں اور 28 سالہ ہانیہ کو چھٹا نمبر دیا گیا ہے۔ اس فہرست میں پہلے نمبر پر 35 سالہ آسٹریلیائی اداکارہ مارگوٹ روبی، دوسرے نمبر پر امریکی اداکارہ شیلنی وڈلے، تیسرے نمبر پر چینی اداکارہ دلرابا دلمورت، چوتھے نمبر پر کورین اسٹار نینسی مکڈونی ہیں۔ ساتویں نمبر پر ہالی ووڈ اداکارہ اور سوپر اسٹار ٹام کروز کی مبینہ گرل فرینڈ آنا دی آرمس، آٹھویں نمبر پر 35 سالہ اداکارہ و پروڈیوسر ایما واٹسن، نویں نمبر پر امبر ہرڈ اور دسویں نمبر پر 24 سالہ ترک اداکارہ و ماڈل ہاندے آرچل ہیں۔
