لکھیم پور کھیری واقعہ پر راہول گاندھی کا شدید ردعمل
نئی دہلی: کانگریس قائد راہول گاندھی نے اتر پردیش کے لکھیم پور کھیری میں کسانوں کو کچلنے کے واقعہ کو غیر انسانی قرار دیا اور کہا کہ اس قربانی کو رائیگاں نہیں جانے دیا جائے گا۔ راہول گاندھی نے ٹوئٹ کرکے ایک خبر پوسٹ کی ہے کہ بی جے پی لیڈر کی گاڑی نے کسانوں کو کچل دیا، جس کے بعد اتر پردیش کے لکھیم پور کھیری میں کسانوں نے کار میں آگ لگا دی۔وزیر اعظم نریندر مودی کا نام لیے بغیر ان پر تنقید کرتے ہوئے انہوں نے ٹوئٹ کہا کہ جو اس غیر انسانی قتل عام کو دیکھ کر بھی خاموش ہے وہ پہلے ہی مر چکا ہے۔ لیکن ہم اس قربانی کو رائیگاں نہیں جانے دیں گے۔ کسان ستیہ گرہ زندہ باد۔خبروں میں کہا جا رہا ہیکہ لکھیم پور کھیری میں مرکزی وزیر مملکت برائے داخلہ اجے مشرا کے بیٹے نے کسانوں پر اس وقت گاڑی چڑھا دی، جب کسانوں نے مرکزی وزیر مملکت برائے زراعت اجے مشرا اور ریاست کے نائب وزیر اعلیٰ کیشوا پرساد موریہ کے آنے کی اطلاع پر ہیلی پیڈ پر قبضہ کرلیا۔ کسان زراعت سے متعلق قوانین کو واپس لینے کا مطالبہ کر رہے تھے۔
