کانگریس کے اقتدار میں آنے پر پرینکا گاندھی کا وعدہ ، پٹرول اور ڈیزل کی قیمتوں میں مسلسل اضافہ پر شدید تنقید
نئی دہلی :کانگریس کی جنرل سکریٹری پرینکا گاندھی نے ایک بار پھر اتر پردیش کے عوام سے بڑا وعدہ کیا ہے۔ پرینکا گاندھی نے ٹوئٹ کرتے ہوئے کہا کہ اگر ریاست میں کانگریس کی حکومت بنتی ہے تو 10 لاکھ روپے تک کی کسی بھی بیماری کا مفت علاج کیا جائے گا۔پرینکا گاندھی نے کہا کہ کورونا کے دور میں حکومت کی لاپرواہی اور اب ریاست میں پھیلے بخار کی وجہ سے یوپی کے صحت کے نظام کی خستہ حالت سب نے دیکھی۔ سستے اور اچھے علاج کے لیے منشور کمیٹی کی رضامندی سے یوپی کانگریس نے فیصلہ کیا ہے کہ حکومت بننے پر کسی بھی بیماری پر 10 لاکھ روپے تک کا مفت سرکاری علاج دیا جائے گا۔اس سے قبل، پرینکا گاندھی نے 2022 میں کانگریس کی حکومت بننے پر انٹر پاس لڑکیوں کو اسمارٹ فون اور گریجویٹ پاس لڑکیوں کو الیکٹرک اسکوٹی دینے کا بھی وعدہ کیا تھا۔ پرینکا گاندھی نے خواتین کو 40 فیصد اسمبلی ٹکٹ دینے کا بھی اعلان کیا ہے۔ دوسری طرف کانگریس جنرل سکریٹری اور اتر پردیش کی پارٹی انچارج پرینکا گاندھی نے مہنگائی اور بے روزگاری سمیت دیگر مسائل پر مودی حکومت کو آڑے ہاتھوں لیتے ہوئے کہا کہ حکمراں پارٹی کی غلط پالیسیوں کی وجہ سے مسائل بڑھ رہے ہیں اور لوگوں کی پریشانیوں میں بے تحاشہ اضافہ ہورہا ہے۔حکومت کی پالیسیوں کو عوام مخالف قرار دیتے ہوئے پرینکا گاندھی نے کل کہا کہ حکومت نے لوگوں کی مشکلات بڑھانے میں ریکارڈ بنایا ہے۔ انہوں نے ٹویٹ کیا کہ”مودی جی کی حکومت نے عوام کو تکلیف پہنچانے کے معاملے میں بڑے ریکارڈ بنائے ہیں۔”گزشتہ ایک سال کے دوران پیٹرول کی قیمتوں میں 23 روپے سے زائد اضافے کا انکشاف کرنے والی ایک میڈیا رپورٹ کا حوالہ دیتے ہوئے انہوں نے کہا، ’’مودی حکومت میں بے روزگاری سب سے زیادہ ہوئی ہے، مودی حکومت میں سرکاری املاک فروخت کی جارہی ہیں، مودی سرکار میں پیٹرول کی قیمت ایک سال میں سب سے زیادہ بڑھی۔قابل ذکر ہے کہ اتر پردیش میں آئندہ اسمبلی انتخابات کے پیش نظر پرینکا گاندھی سمیت اپوزیشن پارٹیوں کے لیڈران مہنگائی کے مسئلے پر مودی حکومت کو گھیر کر اسے بڑا انتخابی مسئلہ بنانے کی کوشش کر رہے ہیں۔
